Mark 1 - New Testament in Braid Scots 1904 (William Wye Smith)

CHAPTIR ANE. John and his bapteezin. The beginnin oʼ great warks. Wha prays weel, works weel!

¹ The first oʼ the Blythe‐Message oʼ Jesus Christ, Godʼs Son.

² Eʼen as it is putten‐doon by Esaiah the prophet, “Lo! I send oot my messenger afore thy face, wha sal mak ready thy way for thy comin.

³ “The sough oʼ ane cryin oot iʼ the waste, ‘Mak ye ready a gate for the Lord! Mak straucht his fit‐roads!’ ”

⁴ Than raise John, bapteezin iʼ the muirlands, and preachin repentance‐baptism for the pittin‐awa oʼ sins.

⁵ And thar gaed oot till him aʼ the kintra‐side oʼ Judea, and aʼ thae oʼ Jerusalem, and war bapteezʼt oʼ him iʼ the River Jordan, tellin oot their sins.

⁶ And John was cleedit wiʼ camelsʼ?-?hair, and had a leather belt aboot him; and he did eat locusts and rock?-?hinny.

⁷ And quoʼ he in his preachin, “Ane sterker nor I comes eftir me, the whang oʼ whase shoon I am‐na fit to lout doon and lowse!

⁸ “I watir‐bapteeze ye; but he sal bapteeze ye wiʼ Holie Spirit!”

⁹ And iʼ thae days it cam aboot that Jesus cam frae Nazareth iʼ Galilee and was bapteezʼt oʼ John in Jordan.

¹⁰ And he, comin straucht frae the watir, saw the heevens unsteekit, and the Spirit like a doo comin doon upon him.

¹¹ And a voice cam frae Aboon, “Thou art the Beloved, My Son; in Thee I delicht!”

¹² And noo the Spirit leads him oot intil the muirlands.

¹³ And he was iʼ the muirlands forty days, tempit oʼ Sautan; and he was wiʼ the wild beasts; and the Angels waitit on him.

¹⁴ And eftir John was deliverʼt up, Jesus cam intil Galilee, giean oot the Blythe‐Message oʼ God;

¹⁵ And sayin, “The waitin‐time is by‐past, and the Kingdom oʼ God has come; turn ye, and lippen the Joyfuʼ‐Message!”

¹⁶ And gaun on by the Loch oʼ Galilee, he saw Simon, and Andro (Simonʼs brither), castin aboot iʼ the Loch; for they war fishermen.

¹⁷ And Jesus says to them, “Come ye eftir me, and Iʼse mak ye fishers oʼ men!”

¹⁸ And at ance, leaʼin their nets, they followʼt eftir him.

¹⁹ And gaun on a wee, he saw James, Zebedeeʼs son, and John his brither, iʼ the boat, pittin their nets iʼ guid fettle.

²⁰ And at ance he caʼd them; and leaʼin their faither iʼ the boat wiʼ the fisher‐men, they gaed eftir him.

²¹ And they cam intil Capernaum; and withoot delay, on the Sabbath day, he cam intil the kirk, and was teachin.

²² And they war uncolie struck wiʼ astonishment at his teachin; for he spak as gin he had authoritie, and no like the Scribes.

²³ And noo, thar was iʼ the kirk a man wiʼ a foul spirit; and he cryʼt oot,

²⁴ Sayin, “What hae we wiʼ thee, thou Jesus oʼ Nazareth? Hast thou come to destroy us? I ken thee, wha thou art — Godʼs Holie Ane!”

²⁵ And Jesus forbad him, sayin, “Haud yere peace! and come oot oʼ him!”

²⁶ And the foul spirit, rivin, and cryinʼ wiʼ a great voice, cam oot oʼ him.

²⁷ And they war aʼ astoundit; sae that they coonsellʼt amang theirsels, “What is aʼ this? A new teachin! Like a Ruler he commauns eʼen the foul spirits, and they do his wull!”

²⁸ And the fame oʼ him spread abreid at ance ower aʼ the hail kintra‐side oʼ Galilee roond aboot.

²⁹ And noo, comin oot oʼ the kirk, they gaed intil the hoose oʼ Simon and Andro, wiʼ James and John.

³⁰ Noo Simonʼs gude‐mither was lyin wiʼ a fivver; and syne they tellʼt him aboot her.

³¹ And he gaed ben, and took her by the haun, and raisʼt her up; and the fivver left her: and she waitit on them.

³² And at eʼenin, iʼ the gloamin, they brocht till him aʼ them that war ill, and them possessʼt wiʼ spirits;

³³ And the hail toun forgatherʼt at the door.

³⁴ And he healed mony that war ill wiʼ aʼ diseases; and cuist oot mony demons; and wadna lat the demons speak; for they kent him.

³⁵ And iʼ the mornin, lang afore the dawin, he raise up and gaed oot, and airtit him till a desert‐bit, and was thar prayin.

³⁶ And Simon, and the lave, followʼt eftir.

³⁷ And they faund him, and quoʼ they to him, “Aʼ folk seek thee!”

³⁸ And he says to them, “Lat us gang awa to the neist toons, that I may preach thar as weel; for to this end cam I oot.”

³⁹ And he gaed intil the kirks aʼ throwe Galilee, preachin and castin oot demons.

⁴⁰ And thar cam till him a leper, and besocht him, and loutit doon afore him, sayin to him, “Gin aiblins thou wad, thou can mak me clean!”

⁴¹ And, touchʼt wiʼ rewth, he raxʼt oot his haun, and touchʼt him, and quoʼ he, “I wull; be ye clean!”

⁴² And at ance the leprosy gaed frae him, and he was recoverʼt.

⁴³ And he stricklie chairged him; and than bad him awa;

⁴⁴ And says to him, “See! say ye nocht to ony; but gang yere ways, and schaw yersel to the priest, and offer for yere makin‐clean what Moses pat doon, to testify to them.”

⁴⁵ But he gaed oot, and begude to spread abreid the tale, sae that Jesus coud‐na gang intil ony citie, but was oot‐by in desert‐places: and they war comin till him frae aʼ pairts.