Luke 3 - New Testament in Braid Scots 1904 (William Wye Smith)

CHAPTIR THRIE. Jesus bapteezʼt; and his genealogy.

¹ Noo, iʼ the fifteenth year oʼ the rule oʼ Tiberius Cesar, Pontius Pilate bein Governor oʼ Judea, and Herod Tetrarch oʼ Galilee; Philip, his brither, bein Tetrarch oʼ the kintra oʼ Iturea and Trachonitis, and Lysanius Tetrarch oʼ Abilene,

² Iʼ the Heigh‐priesthood oʼ Annas and Caiaphas, the word oʼ God cam to John, Zachariahʼs son, iʼ the muirlands.

³ And he cam till aʼ pairts aboot Jordan, preachin repentance‐baptism, and remittin oʼ sins.

⁴ As it is putten‐doon iʼ the buik oʼ the sayins oʼ Esaiah the prophet, “The sough oʼ ane cryin oot iʼ the muirlands, ‘Mak ye gangable the Lordʼs way! mak straucht his fit‐roads.’

⁵ “Ilka heugh sal be filled heigh; and ilka mountain and hill sal be made laigh, and the gleyʼt sal be made straucht, and the rouch ways plain;

⁶ “And aʼ flesh sal look on Godʼs salvation!”

⁷ Sae he was sayin to the thrangs that gaed oot to be bapteezʼt by him, “Ye brood oʼ vipers! wha wasʼt that warned you to flee frae the comin wrath?

⁸ “Bring ye than forth frutes fit for repentance; and begin‐na to say wiʼ yersels, ‘We hae a faither, eʼen Abraʼm!’ For say I tʼye, that God coud raise up oʼ thae stanes bairns till Abraʼm!

⁹ “And eʼen noo the axe is by the rute oʼ the trees: ilka tree bringin‐na forth gude fruit is cuttit doon, and cuisten intil the lowe.”

¹⁰ And the thrang oʼ folk war speirin at him, “What than, sal we do?”

¹¹ And he answerʼt, “He that has twa coats, lat him bestow on him that has nane: and he that has meat, lat him dae the same.”

¹² Than cam tax‐men to be bapteezʼt, and said to him, “Maister! what are we to do?”

¹³ And he says to them, “Tak frae the folk nae mair than what is set for ye!”

¹⁴ And sodgers, too, war speirin at him, “And we, what sal we do?” And he said to them, “Lift the strang haun to nane, naither grip aucht wrangously; and be content wiʼ yere providin.”

¹⁵ Noo, as aʼ the folk war lookin forrit, and war switherin iʼ their hearts aboot John, gin aiblins he micht be the Messiah;

¹⁶ John answerʼt, sayin till ane‐and‐aʼ, “I, indeed, bapteeze ye wiʼ watir; but Ane comes wha is michtier than I; the whang oʼ whase shoon I am‐na fit to lout doon and lowse. He sal bapteeze ye wiʼ Holie Spirit and wiʼ fire.

¹⁷ “Whase fan is in his neive, and he will redd up his threshin‐floor, and teem his wheat intil his girnal, but the cauff will he burn wiʼ nevir‐endin lowe!”

¹⁸ Wiʼ mony mair exhortins was he deliverin the Gude‐tidins to the people.

¹⁹ But Herod, the King‐depute, being repruvʼd by him anent Herodias, his brother Philipʼs wife, and for aʼ the mony ills Herod had dune,

²⁰ Addit this tillʼt aʼ, that he cuist John in prison.

²¹ Noo, it was, that whan aʼ the folk war bapteezʼt, Jesus too was bapteezʼt, and continued in prayer — and the heevens war unsteekit,

²² And the Holie Spirit cam doon in bodily form like a doo upon him; and a voice cam oot oʼ the heevens, “Thou art my Son, the Beloved Ane; in Thee I delicht!”

²³ And Jesus was, at the first, aboot thretty years oʼ age; bein son — as was believʼt — oʼ Joseph, oʼ Heli,

²⁴ Oʼ Matthat, oʼ Levi, oʼ Melchi, oʼ Jannai, oʼ Joseph,

²⁵ Oʼ Mattathias, oʼ Amos, oʼ Nahum, oʼ Esli, oʼ Naggai,

²⁶ Oʼ Maath, oʼ Mattathias, oʼ Semein, oʼ Josech, oʼ Joda,

²⁷ Oʼ Joanan, oʼ Rhesa, oʼ Zerubbabel, oʼ Shealtiel, oʼ Neri,

²⁸ Oʼ Melchi, oʼ Addi, oʼ Cosam, oʼ Elmadam, oʼ Er,

²⁹ Oʼ Jesus, oʼ Eliezer, oʼ Jorim, oʼ Matthat, oʼ Levi,

³⁰ Oʼ Symeon, oʼ Judas, oʼ Joseph, oʼ Jonam, oʼ Eliakim,

³¹ Oʼ Melea, oʼ Menna, oʼ Mattatha, oʼ Nathan, oʼ Dauvid.

³² Oʼ Jesse, oʼ Obed, oʼ Boaz, oʼ Salmon, oʼ Nahshon,

³³ Oʼ Amminadab, oʼ Arni, oʼ Esrom, oʼ Perez, oʼ Judah,

³⁴ Oʼ Jaucob, oʼ Isaac, oʼ Abraʼm, oʼ Terah, oʼ Nahor,

³⁵ Oʼ Serug, oʼ Reu, oʼ Peleg, oʼ Eber, oʼ Shelah,

³⁶ Oʼ Cainan, oʼ Arphaxad, oʼ Shem, oʼ Noah, oʼ Lamech,

³⁷ Oʼ Methusalah, oʼ Enoch, oʼ Jared, oʼ Mahalaleel, oʼ Cainan,

³⁸ Oʼ Enos, oʼ Seth, oʼ Adam, oʼ GOD.