Luke 24 - New Testament in Braid Scots 1904 (William Wye Smith)

CHAPTIR TWENTY‐FOUR. The tomb coud‐na haud him! The forgatherin on the road to Emmaus. His coonsel, and his waʼ gaun.

¹ Noo, on the first oʼ the week, at the dawin, they cam to the tomb, feshin the spices they had gotten ready.

² And they faund the stane to be rowʼt awaʼ frae the tomb.

³ And gaun in, they found‐na the body oʼ the Lord Jesus!

⁴ And it was, as they war unco putten aboot at it, lo! twa men stood nar‐by them, cleedit in glintin robes!

⁵ And, as they war fleyʼt, and loutit doon their faces to the yird, they said to them, “Why sud ye seek the leevin amang the deid?

⁶ “He isna here! he raise! Mind‐ye‐na hoo ho spak to ye, whan he was still in Galilea?

⁷ “Sayin, ‘The Son oʼ Man bude be deliverʼt intil the hands oʼ sinfuʼ men; and be crucifyʼt, and the third day rise again!’ ”

⁸ And they caʼd to mind his words.

⁹ And cam back frae the tomb, and reportit aʼ thir things to the Eleeven, and till aʼ the lave.

¹⁰ Noo, it was Mary oʼ Magdala, and Joanna, and Mary oʼ James, and the lave wiʼ them, that war tellin thir things to the Apostles.

¹¹ And their reports war to them like idle clashes, and they didna lippen them.

¹² But Peter raise, and ran to the tomb; and loutin doon, he saw but the linen claes; and gaed awa, debatin in himsel as to what had come to pass!

¹³ And mark! twa frae ʼmang them war gaun on their journey, that vera day, till a village seeven or aucht mile frae Jerusalem, caʼd Emmaus.

¹⁴ And they spak thegither oʼ aʼ thae things that had happened.

¹⁵ And it cam aboot, as they war speakin and reasonin thegither, Jesus his sel cam nar, and gaed wiʼ them.

¹⁶ But their sicht was hauden, that they soudna ken him.

¹⁷ And he says to them, “Whatna words are thae that ye hae ane to anither, as ye gang on?” And they stude still, wiʼ a sorrowfuʼ look.

¹⁸ But ane, by name Cleopas, answerʼt, “Div ye bide by yere lane in Jerusalem, and hae‐na kent aʼ the things that hae cam aboot iʼ thir days?”

¹⁹ And he said, “Whatna things?” And they said to him, “Anent Jesus oʼ Nazareth, that was a prophet, a man michty in deed and word, in Godʼs sicht, and oʼ aʼ the folk.

²⁰ “And in whatna way oor Heid‐priests and Rulers deliverʼt him up to deid, and hae crucifyʼt him.

²¹ “But we lippened it wad hae been he that was to deliver Israʼl; and forby aʼ this, the day is the third day sinʼ thae things war dune.

²² “Aye! and a wheen weemen oʼ oor ain garʼt us be astonishʼt — gaun earʼ to the tomb,

²³ “And no findin his corp, they cam sayin they had seen a vision oʼ angels, that said he was leevin!

²⁴ “And some that war oʼ us gaed to the tomb; and faund it eʼen as the weemen had said; but they saw‐na him.”

²⁵ And he says to them, “Oh, glaikit anes! and dour in yere hearts to lippen to the things the Prophets hae said.

²⁶ “Wasʼt no for the Christ to suffer thae vera things? and to enter intil his glorie?”

²⁷ And, beginnin frae Moses, and frae aʼ the Prophets, he made plain to them in aʼ the Scripturs the things anent himsel.

²⁸ And they cam nar to the village they war gaun till; and he lookit as gin he was gaun on.

²⁹ But they pressed him, sayin, “Bide ye wiʼ us! the day is far gane, and the nicht is comin!” And he gaed in to stop wiʼ them.

³⁰ And it cam aboot, whan he was sutten doon wiʼ them to meat, he took the laif, and blessʼd; and breikin it, gied till them.

³¹ And their eʼen war unsteekit; and they kent him! and he disappearʼt frae them.

³² And they said ane to the ither, “Did oor heart no lowe within us, while he was speakin to us on the way, and exponin to us the word!”

³³ And they raise up that vera oor, and gaed back till Jerusalem, and faund foregatherʼt the Eleeven, and thae wiʼ them, sayin,

³⁴ “The Lord did rise! and appearʼt to Simon!”

³⁵ And they war tellin the things by the road; and hoo he was made kent to them iʼ the breikin oʼ breid.

³⁶ And as they war thus tellin, he his sel stude iʼ the mids, and says, “Peace be till ye!”

³⁷ But they war sair putten‐aboot, and fleyʼt, thinkin they saw an apparition.

³⁸ And he said to them, “What for are ye putten‐aboot? and why soud doots be in yere hearts?

³⁹ “See ye my hauns and my feet, that it is I mysel! Touch me, and see; for a spirit hasna flesh and banes as ye see me hae!”

⁴⁰ And whan he had sae said, he airtit them till his hauns and his feet.

⁴¹ And while they coudna yet believe for joy, and ferlied, he said to them, “Hae ye here onything to eat?”

⁴² And they gied him a piece oʼ a branderʼt speldrin, and oʼ a hinny‐kaim.

⁴³ And, raxin oot afore them, he did eat.

⁴⁴ And he said to them, “Thir are the words I spak tʼye, bein yet wiʼ ye; that they maun needs be fulfilled — aʼ things putten‐doon iʼ the law oʼ Moses, and the Prophets, and Psalms, anent me.”

⁴⁵ Than garʼt he their minds open, that they soud comprehend the Scripturs:

⁴⁶ And said to them, “Sae is it putten doon, and sae it behovʼd the Messiah to dee, and to rise frae the deid on the third day.

⁴⁷ “And that repentance and the pittin awa oʼ sins soud be proclaimed in his name till aʼ nations; beginnin at Jerusalem.

⁴⁸ “Ye are witnesses oʼ thir things.

⁴⁹ “And lo! I send oot the promise oʼ my Faither upon ye; but bide ye iʼ the citie, till ye be cleedit wiʼ pooer frae Aboon!”

⁵⁰ And he led them oot, the lenth oʼ Bethanie; and, haudin up his hauns, he blessʼd them.

⁵¹ And it cam aboot, that eʼen while he was blessin them, he pairtit frae them, and was taʼen up to Heeven.

⁵² And they paid worship to him; and gaed back till Jerusalem, wiʼ mickle joy;

⁵³ And war aye iʼ the Temple, laudin and blessin God.