Luke 23 - New Testament in Braid Scots 1904 (William Wye Smith)

CHAPTIR TWENTY‐THRIE. Jesus afore Pilate and Herod. Hoo they micht hae played the man and dune the richt, but failed! The Lordʼs death and burial.

¹ And they, ane and aʼ, raise, and led him to Pilate.

² And they begude to wyte him, sayin, “This ane we faund pervertin the nation, and challengin the giean oʼ tribute to Cesar; makin his sel oot to be a king.”

³ And Pilate speirʼt at him, “Are ye the King oʼ the Jews?” And he, answerin him, says “Ye say it.”

⁴ And Pilate says to the Heid‐priests and the croods oʼ folk, “I find naething wrang iʼ this man!”

⁵ But they made an unco bruilzie, sayin, “He is steerin up aʼ the folk, teachin aʼ ower Judea, eʼen frae Galilee to here!”

⁶ Noo Pilate, hearin oʼ Galilee, speirʼt “Gin the man was a Galilean?”

⁷ And whan he faund he was frae oot the authoritie oʼ Herod, he sent him back to Herod; he bein in Jerusalem at that time.

⁸ And Herod, seein Jesus, was unco blythe; for he had aft been fain to see him, frae hearin aboot him; and he coontit that he micht see some ferlie wrocht by him.

⁹ And he quaistened him in mony words; but he answerʼt nocht.

¹⁰ And the Heid‐priests and the Scribes war staunin, and desperately wytin him.

¹¹ And Herod, wiʼ his men‐at‐airms, geckin at him and flytin him, cuist aboot him a braw manteel, and sent him back to Pilate.

¹² And they war made gude freends — Herod and Pilate — on that very day, wiʼ ane anither; for afore they had cuisten oot.

¹³ And Pilate, caʼin thegither the Heid‐priests, and the Rulers, and aʼ the folk,

¹⁴ Said till them, “Ye brocht this man to me as ane that sair fashed the nation; and lo! I, takin him to task, hae fund naething in him to wyte, as to the things ye wytit him wiʼ;

¹⁵ “Na, nor yet Herod; for I sent ye to him; and lo! naething wordie oʼ death has been seen in him.

¹⁶ “Sae, then, haein beat him, I wull let him gang!”

¹⁷ For it behoved him to lowse ane to them at the feast.

¹⁸ But they cryʼt oot — and the haill crood — sayin, “Awaʼ wiʼ him! and gie to us Barabbas!”

¹⁹ Wha for treason iʼ the citie, and blood‐sheddin, had been cuisten into prison.

²⁰ But again Pilate, wantin to release Jesus, spak to them.

²¹ But they war demandin, sayin, “Crucify! crucify him!”

²² But he, a third time said to them, “Why, whatna ill has he dune? I faund naething wordie oʼ death in him! Wiʼ a chastisement, thar‐for, I wull release him!”

²³ But they war yammerin wiʼ lood voices, demandin to hae him crucifyʼt. And their voices, and oʼ the Heid‐priests, owercam.

²⁴ And Pilate loot their demand be dune.

²⁵ And lat him free, wha for treason and murder had been cuisten intil prison; but Jesus he gied ower to their wull.

²⁶ And as they led him awa, they laid haud on a particular man, Simon, a Cyrenian, comin frae oot‐by, and laid the cross on him, to cairry it eftir Jesus. And Jesus gaed on, wiʼ his cross ahint him.

²⁷ And a great crood followʼt him; and weemen, wha war makin their maen and lamentin him.

²⁸ But, turnin him aboot, Jesus said, “Dochters oʼ Jerusalem! greet‐ye‐na for me; but greet sair for yersels and for yere weans!

²⁹ “For lo! the days are comin whan they wull say, ‘Happy the barren! the wombs that bare‐na, and the breists that nouriced‐na!’

³⁰ “Than wull they begin to cry to the mountains, ‘Faʼ on us!’ and to the hills, ‘Hap us up!’

³¹ “For gin sic things as thir are dune iʼ the green tree, what maun come to pass iʼ the dry?”

³² And thar war taʼen oot twa mair, ill‐doers, wiʼ him, to be crucifyʼt.

³³ And whan they cam to the place they caʼd “The Skull,” thar they crucifyʼt him; the ill‐doers as weel; ane, indeed, on his richt haun and the ither on the left.

³⁴ But Jesus was sayin, “Faither forgie them; for they see‐na what they are doin!” And, pairtin his cleedin, they cuist the lot.

³⁵ And the folk war staunin, lookin on. And the Rulers war jeerin, sayin, “He rescued ithers; lat him rescue his selʼ! gin he be the Anointit, Godʼs chosen Ane!”

³⁶ And the sodgers, too, war geckin at him, comin and profferin him vinegar,

³⁷ And sayin, “Gin ye be King oʼ the Jews, rescue yere sel!”

³⁸ And forby, thar was a writin inscribit aboon his heid, “This is the King oʼ the Jews!”

³⁹ And ane oʼ the crucifyʼt ill‐doers was bannin him, sayin, “Are‐na ye the Anointit? Rescue yere selʼ and us!”

⁴⁰ But the ither ane rebukit him, sayin, “Hae ye nae fear oʼ God, seein ye are iʼ the like condemnation?

⁴¹ “To us, richt eneuch; for we are eʼen winnin oor deservins; but this Ane did naething wrang!”

⁴² And he said, “Lord, hae mind oʼ me whan ye come intil yere Kingdom!”

⁴³ And Jesus says to him, “Truly say I tʼye, this day sal ye be wiʼ me in Paradise!”

⁴⁴ And it was aboot twal oʼclock; and a mirk cam ower aʼ the lanʼ till thrie oʼclock.

⁴⁵ And the sun was hid iʼ the mirk; and the curtain oʼ the Temple was rived iʼ the mids.

⁴⁶ Anʼ cryinʼ wiʼ a lood voice, Jesus said, “Faither! intil thy hauns I commend my spirit!” And whan he had sae said, he deeʼt.

⁴⁷ And the Captain, seein aʼ that had come aboot, was giean God glorie, sayin, “In vera truth, this man was richtous!”

⁴⁸ And aʼ the folk that had gaitherʼt to that sicht, seein aʼ the things that war dune, gaed awa beatin their breists.

⁴⁹ And aʼ his acquaintance war staunin thar, far awa; and the weemen that followʼt him frae Galilee, behauldin thir things.

⁵⁰ And see! a man by name Joseph, a Coonsellor, a gude and upricht man;

⁵¹ (The same wasna wiʼ them iʼ their ill‐deed) oʼ Arimathea, a Jewish citie, wha his sel was waitin for the Kingdom oʼ God —

⁵² The same, gaun till Pilate, craved the body oʼ Jesus.

⁵³ And takin it doon, he rowʼt it in linen, and laid it intil a tomb that was cuttit iʼ the rock, whaurin was nae man yet laid.

⁵⁴ And it was the Preparation‐day; and the Sabbath was comin on.

⁵⁵ And the weemen wha had come frae Galilee followʼt eftir, and saw the tomb, and how the corp was laid.

⁵⁶ And, gaun back, they gat ready spices and ointment: and war quate on the Sabbath, accordin to the Commandment.