Jude 1 - New Testament in Braid Scots 1904 (William Wye Smith)

CHAPTIR ANE. Warnins again corrupt sins. The Lord is comin!

¹ Jude, a servitor oʼ Jesus Christ, brither oʼ James, to thae wha bein in God the Faither beloved anes, and keepit in Jesus Christ, are the chosen.

² Mercie to you, and peace and love, be made mair!

³ While I was giean aʼ tent to be writin to ye oʼ oor common salvation, I fand it necessar to write to ye, exhortin ye to strive uncolie for the faith ance‐and‐for‐aʼ gien to the saunts.

⁴ For thar slippit in a wheen men, oʼ wham it was putten‐doon lang syne, that this soud be their condemnation, ungodlie anes — oor Godʼs lovin‐favor turnin intil wantonness, and disownin oor only Lord Jesus Christ.

⁵ I am thar‐for disposed to pit ye in mind, thoʼ ance‐and‐for‐aʼ ye ken aʼ things, that the Lord, haein saved a folk oot oʼ the land oʼ Egypt, did again destroy them wha believed‐na.

⁶ Angels too, thae wha mainteenʼd‐na their ain station, but left their ain place, has he keepit for judgment oʼ a great day, in evir‐durin bonds, in mirkness.

⁷ As Sodom and Gomorrah, and the cities aboot them, for that in siclike they gaed oot to commit uncleanness, and gaun eftir strange flesh, are set forrit as a warnin, dreein the penalty of endless fire.

⁸ And in siclike, eʼen thir dreamers defile the flesh, despise authoritie, and miscaʼ dignities;

⁹ Whaur‐as Michael the Archangel, whan contendin wiʼ Sautan he debatit aboot Mosesʼ body, daurna miscaʼ him; but quoʼ he, “The Lord repruve ye!”

¹⁰ But thir, as mony things as they ken‐na, they miscaʼ; while in as mony things as they ken by nature as the beass without reason, in thir they corrupt theirsels.

¹¹ Alack for them! for they gaed on iʼ the path oʼ Cain, and warslʼt forrit iʼ the sin oʼ Balaam, and perishʼt iʼ the mockery oʼ Korah.

¹² Thir are they that are like hidlin rocks at yere love‐feasts, whan they feast wʼye; shepherds feedin theirsels withoot shame; cluds wantin moisture, by the winds driven on; trees oʼ the leaf‐faʼin, wantin frute, twice deid, rived up by the rutes;

¹³ Wild waves oʼ the sea, foamin oot oʼ their ain shame; gangrel starns, for wham black mirkness has been keepit for aye.

¹⁴ And to thir prophesyʼt Enoch, the seeventh frae Adam, and quoʼ he, “Behauld! the Lord cam, amang his holie myriads,

¹⁵ “To gie judgment upon aʼ, and to sentence aʼ the ungodlie anent aʼ their warks oʼ wickedness they for ungodliness had done; and anent aʼ the hard things they spak again him; sinfuʼ, ungodlie men!”

¹⁶ Thir are yammerers, compleenin anes, gaun on eftir their ain desires; and their mouʼ speak heigh swallin words, fleeching and flatterin folk for their ain ends.

¹⁷ But ye beloved, mind ye the words afore spoken by the Apostles oʼ oor Lord Jesus Christ;

¹⁸ For they tellʼt ye that iʼ the last times thar soud be mockers, gaun on conform to their own ungodlie desires.

¹⁹ Thir are they that mak separations; nateral men, no possessin the Spirit:

²⁰ But ye beloved, up‐biggin yersels iʼ yere maist holie faith, prayin iʼ the Holie Spirit,

²¹ Keep yersels in Godʼs love, lookin for the mercie oʼ oor Lord Jesus Christ until life‐for‐aye.

²² And on some hae unco compassion, while they argue wʼye;

²³ And ithers save wiʼ terrors, cleekin them oot oʼ the lowe; and on ithers hae mercie in fear, hatin eʼen the garment stained by the flesh.

²⁴ Noo to him wha is strang to gaird ye frae faʼin, and to set‐ye‐doon iʼ the presence oʼ his glorie faultless, wiʼ unco rejoicin,

²⁵ To this ae God oor Saviour, throwe Jesus Christ oor Lord, be glorie, heighness, dominion, and pooer, afore aʼ time past, and noo, and for aʼ time to come! Amen!