John 4 - New Testament in Braid Scots 1904 (William Wye Smith)

CHAPTIR FOWR. Jaucobʼs waal, and the watir for the saulʼs drouth. The great manʼs bairn.

¹ Noo, whan the Lord kent the Pharisees had word that he gaitherʼt in and bapteezʼt mair folk than John did —

² (But it was the disciples, and no Jesusʼ sel wha bapteezʼt) —

³ He quat the Jewsʼ kintra‐side, and gaed awa again intil Galilee:

⁴ And he behoved to gang athort Samaria.

⁵ And he lichtit on a Samaria citie caʼd Sychar; nar‐haun the bit grunʼ Jaucob giʼed to Joseph.

⁶ And Jaucobʼs waal was thar‐at. And Jesus, forfouchten wiʼ the way, cuist his sel doon on the waal: and it was aboot the denner‐time.

⁷ Than thar cam a Samaria‐wumman forrit, to draw watir. Quoʼ Jesus, “Lat me have a sowp oʼ watir!”

⁸ (His disciples had aʼ gane to the citie for meat.)

⁹ Quoʼ the Samaria‐wumman, “Hoo isʼt that ye, bein a Jew, are seekin drink frae me, a Samaria‐wumman?” (For the Jews hae nae trokin nor neeborliness wiʼ the Samaria‐folk.)

¹⁰ Quoʼ Jesus, “Gin ye kent Godʼs Gift, and wha it soud be that said ‘Gie me a sowp oʼ watir,’ ye wad hae socht frae him the Leevinʼ Watir — and gottenʼt too!”

¹¹ Said the wumman to him, “Sir, ye hae naething to lat doon the waal, and the waalʼs unco deep; whaur finʼ ye the Leevin Watir?

¹² “Ye canna be greater nor oor forebear Jaucob, wha gied us the waal, and slockened his ain drouth wiʼt, and the drouth oʼ his bairns — and his beasts?”

¹³ Jesus said to her, “Wha may drink this watir wull be drouthie syne;

¹⁴ “But wha drinks oʼ the watir I gie him, sal be drouthie nevirmair; for the watir I gie him sal be in him an unseen waal, springin up intil Life Eternal!”

¹⁵ The wumman cryʼt oot, “Sir, lat me hae this watir! no to be drouthie, and neʼer to fash to come to the waal again!”

¹⁶ Quoʼ Jesus, “Gang awa, and caʼ yere gudeman, and come again belyve!”

¹⁷ But the wumman said to him, “I haena a gudeman!” Quoʼ Jesus, “Ye hae dune richt to say ye haena a gudeman;

¹⁸ “For ye hae had fyve; and the ane ye hae e‐noo is no yere ain gudeman; ye spak truth thar.”

¹⁹ Quoʼ the wumman, “Sir, I jalouse ye maun be a Prophet!

²⁰ “Oor forebears worshipped iʼ this vera mountain; but yere folk say Jerusalemʼs the place whaur folk soud worship —”

²¹ Jesus pat in, “Wumman, lippen to me! the ʼoorʼs at haun, whan naither here, nor yet thar, sal they worship the Faither!

²² “Ye ken‐na what ye serʼ; but we ken what we worship; and salvation comes frae amang the Jews.

²³ “But the ʼoor is at haun, and eʼen noo it comes, whan Godʼs ain worshippers sal worship the Faither in the truth and wiʼ the Spirit — for the Faither wad hae siclike to seek him.

²⁴ “God is a spirit; and wha worship him maun eʼen do sae iʼ the spirit and wiʼ the truth.”

²⁵ The wumman says, “I ken Messiahʼs comin, that folk caʼ ‘The Christ’; whan he comes, heʼll tell us aʼ.”

²⁶ Jesus spak — “I thatʼs noo speakin tʼye am ‘The Christ!’ ”

²⁷ On the back oʼ this cam the disciples, and ferlied that he soud be speakin wiʼ the wumman; but nane oʼ them speirʼt, “What are ye seekin?” nor, “Hoo isʼt that ye talk wiʼ the wumman?”

²⁸ Than the wumman, leavin her watir‐stoup, gaed awa to the citie, and cryʼt oot to the men,

²⁹ “Coʼ way! and see a man that tellʼt me aʼ that evir I did! Is he no the Messiah?”

³⁰ Then they gaed oot oʼ the citie to come till him.

³¹ But atween times his disciples war ask‐askin him, “Maister! wull ye no eat?”

³² But quoʼ he to them, “I hae meat that ye ken‐na!”

³³ And sae they speirʼt ane oʼ anither, “Think ye ony ane brocht him ocht to eat?”

³⁴ Quoʼ Jesus, “Itʼs meat to me to do his wull that sent me, and finish his wark!

³⁵ “Div ye no say, ‘Fowr months, and than the hairst’? But unsteek yere een and see the fields — theyʼre whitenin till the hairst eʼen noo!

³⁶ “And the shearer wins his fee, and gaithers till him an eternal hairst; and the sawer and shearer are baith blythe thegither!

³⁷ “And the auld proverb comes true ower again, ‘Ane saws, and syne anither shears!’

³⁸ “I bade ye to a hairst whauron ye hadna toiled: ither men toiled, and ye are entered on their reward.”

³⁹ And mony oʼ the Samaria‐folk lippened on him for the wummanʼs sake, wha aye threepit, “He tellʼt me aʼ that evir I did!”

⁴⁰ Sae whan they cam till him they besocht him to bide wiʼ them; and he stoppit twa‐thrie days thar.

⁴¹ And a hantle mair believed whan they heard his ain word;

⁴² And quoʼ they to the wumman, “Noo we believe — no for yere report — for oor ain lugs hae heard him; and noo we ken that he is the Anointit Ane, the warldʼs Saviour!”

⁴³ And twa days eftir he gaed forth again intil some oʼ the pairts oʼ Galilee.

⁴⁴ For Jesus his sel testifyʼt that “a Prophet had nae repute in his ain kintra‐side.”

⁴⁵ Syne he cam intil the pairts oʼ Galilee, and the folk thar acceptit him, for they had seen aʼ that he did at the Feast in Jerusalem; (for they as weel gaed up till the Feast).

⁴⁶ And ance mair he cam up till Galilee‐Cana, whaur he made the watir wine. And there was a certain hie officer, whase son was ill at Capernaum.

⁴⁷ As sune as he got a sough oʼ Jesus comin oot oʼ Judea intil Galilee, he gaed till him, and besocht him to come doon and heal his son; for he was in extremitie.

⁴⁸ Jesus answerʼt him, “Gin ye see‐na signs and ferlies, yeʼre set again believin.”

⁴⁹ The great man says to him, “Sir, come awa doon, ʼor my bairn dee!”

⁵⁰ Quoʼ Jesus to him, “Gang yere gate; yere son leeves!” The man lippened the word oʼ Jesus to him, and took the gate.

⁵¹ And as he was eʼen noo gangin doon, his servants met him wiʼ, “Yere sonʼs leevin!”

⁵² Syne he speirʼt at them the ʼoor the illness took a turn? and quoʼ they, “Yestreen, at ane oʼclock oʼ the day, the fivver gaed awa.”

⁵³ Sae the faither kent it was at that ʼoor Jesus said to him, “Yere son leeves!” and he his sel believed and his hail hoose.

⁵⁴ This is the second wuner‐wark Jesus did, bein come oot oʼ Judea intil Galilee.