John 2 - New Testament in Braid Scots 1904 (William Wye Smith)

CHAPTIR TWA. Wine frae the watir jars. The trokersʼ nowte caʼd oot.

¹ On the third day was a bridal at Galilee‐Cana, and Jesusʼ mither was thar;

² And baith Jesus and his disciples had a bode to the bridal.

³ And whan the wine ran dune, Jesusʼ mither said to him, “The wineʼs aʼ dune!”

⁴ Quoʼ Jesus, “Eh, wumman, what hae I to do wiʼ ye e’noo? My ʼoor will be here belyve!”

⁵ But his mither coonsellʼt wiʼ the servants, “Whatsae he bids ye, gang and do it.”

⁶ And thar war staunin sax stane jars, according as the Jews purifyʼt theirsels; and ilk wad haud twa‐thrie firkins.

⁷ And Jesus had them fill the watir‐jars wiʼ watir. And they teemed them lippin‐fou.

⁸ And he spak till them, “Dip oot noo, and tak to the Maister oʼ the feast!” And they gaed wiʼt.

⁹ As sune as the Maister oʼ the feast had preeʼd the watir‐wine (and kent‐na whaur it cam frae; but the servants kent), he cryʼt to the bridegroom,

¹⁰ “Ilka man wales oot his best wine to hansel the feast; and whan folk are weel slockenʼt, than feshes the second‐wale; but ye hae hained the best wine till noo!”

¹¹ Sae Jesus begude to do his wunner‐works in Galilee‐Cana, and schawed forth his glorie: and the disciples lippened on him.

¹² And syne he gaed doon to Capernaum, wiʼ his mither, and his ain folk, and the disciples; and they stoppit thar a wheen days.

¹³ And the Jewish Pasche was nar‐haun, and Jesus syne gaed up to Jerusalem.

¹⁴ And thar iʼ the Temple he cam on the trokers oʼ nowte, and sheep and doos, and the nifferers oʼ siller sittin.

¹⁵ And he made a tawse oʼ smaʼ cords, and caʼd them aʼ oot, and the sheep and the nowte beass; and teemed oot the trokersʼ siller, and coupit their tables.

¹⁶ And tellʼt them that trokit wiʼ doos, “Tak thae things awa; yeʼse no mak my Faitherʼs Hoose a hoose oʼ traffic!”

¹⁷ And the disciples mindit hoo it was putten doon, “Thy Hooseʼs zeal devoors me!”

¹⁸ Than upspak the Jews to him, “What ferlies hae ye to schaw us, gin ye put oot yere haun to siclike wark?”

¹⁹ Jesus said till them, “Mak an end oʼ this temple, and in thrie days Iʼll restore it!”

²⁰ Than cryʼt the Jews, “Sax and forty year gaed by afore this Temple was aʼ biggit, and are ye gaun to bigg it in thrie days?”

²¹ But it was the holie temple oʼ his ain body he spak oʼ.

²² And sae belyve, when he was risen frae the deid, the disciples caʼd to mind that he had said this to them; and they lippened the word, and aʼ that Jesus said.

²³ And whan he was at the Pasche in Jerusalem, as the Feast gaed on, mony begude to believe on his name, whan they saw the ferlies dune aneath his haun.

²⁴ But Jesus didna lippen and gie his sel ower to them, for he kent men,

²⁵ And needit‐na that ony soud tell him aboot a man, for he kent aʼ that was in man.