John 11 - New Testament in Braid Scots 1904 (William Wye Smith)

CHAPTIR ELEEVEN. The kindly folk oʼ Bethanie. Death, and deathʼs Maister.

¹ Noo, a particular ane was ill; Lazarus, oʼ Bethanie; Maryʼs toon, and her sister Marthaʼs toon.

² It was the same Mary wha anointit the Lord wiʼ the ointment, and dightit his feet wiʼ her hair, whase brither Lazarus was ill.

³ Sae his sisters sent word to him, “Lord, see! the lad ye loʼe is sick!”

⁴ Whan Jesus heard it, he said, “This illness is no to bring death, but the glorie oʼ God; sae as Godʼs Son micht be glorifyʼt.”

⁵ Noo Jesus had tender love for Mary, and her sister, and Lazarus.

⁶ Whan, than, he heard he was ill, he ye bade thar twa days iʼ the bit whaur he was.

⁷ Eftir that, quoʼ he to his disciples, “Lat us gang into Judea again!”

⁸ The disciples say to him, “Maister! the Jews eʼen noo ettled to stane ye, and wull ye gang thar‐awa again?”

⁹ Jesus answerʼt, “Are thar no twalʼ oors to a day? Gin ony man gang iʼ the day, he stoiters‐na, for that he sees the licht oʼ this warld.

¹⁰ “But gin ane walk iʼ the nicht, he stoiters, for that the licht isna in him.”

¹¹ Thir things quoʼ he; and eftir he said to them, “Oor freend Lazarus is faun on sleep; but I gang that I may wauken him oot oʼ sleep!”

¹² Than quoʼ the disciples, “Lord, gin he sleep, he maun be on the mend!”

¹³ But Jesus spak oʼ his deein; while they thocht he had spoken oʼ his takin rest in sleep.

¹⁴ Than said Jesus plainly to them, “Lazarus is deid!

¹⁵ “And I am weel pleased, for yere sakes, I wasna yonner, sae as ye may believe; nane‐the‐less, lat us gang to him!”

¹⁶ Than Tammas (he wha was caʼd “The Twin”) says to his neebors, “Lat us aʼ gang, too, that we may dee wiʼ him!”

¹⁷ Than, when Jesus cam, he faund he had been iʼ the tomb for fowr days.

¹⁸ Noo, Bethanie was nar‐haun Jerusalem, no twa mile awa.

¹⁹ And mony folk oʼ the Jews had come oot to Martha and Mary to console them ower their brither.

²⁰ Than Martha, as sune as she kent Jesus was comin, gaed oot and met him; but Mary sat yet iʼ the hoose.

²¹ Sae says Martha to Jesus, “Lord! gin thou had been here, my brither hadna deeʼt!

²² “And eʼen yet, I ken that whateʼer thou may ask oʼ God, God wull gie it thee!”

²³ Quoʼ Jesus to her, “Yere brither sal rise again!”

²⁴ Martha says to him, “I ken he sal rise again, iʼ the Risin at the Last Day!”

²⁵ Jesus said to her, “I am the Risin‐again and the Life! Wha lippens on me, eʼen gin he dee, yet sal he leeve!

²⁶ “And whasae leeves, lippenin on me, sal dee nae mair! Dae ye believe this?”

²⁷ Quoʼ she to him, “Aye, Lord! I believe thou art Godʼs Son, wha was to come intil the warld!”

²⁸ And whan she had said this, she gaed her ways, and caʼd Mary her sister, unkent, sayin, “The Maister is come, and is seekinʼ ye!”

²⁹ And as sune as she kent it, she raise quickly, and gaed till him.

³⁰ Noo Jesus wasna yet come to the toon, but was iʼ the place whaur Martha met him.

³¹ Sae the Jews wha war iʼ the hoose to console her, whan they saw Mary rise up oʼ a suddaintie and gang oot, followʼt her, sayin amang theirsels, “She gangs to the tomb, to wail thar!”

³² Than Mary, bein come whaur Jesus was, fell doon at his feet, sayin to him, “Lord! gin thou had been here, my brither hadna deeʼt!”

³³ Whan Jesus saw her sabbin, and the Jews aʼ greetin that cam wiʼ her, he was unco touched at the heart, and was wrocht‐on.

³⁴ And quoʼ he, “Whaur hae ye laid him doon?” They say to him, “Lord, come awa and see!”

³⁵ Jesus grat.

³⁶ The Jews than said, “See hoo he loʼed him!”

³⁷ But a wheen oʼ them said, “Coud‐na this man, wha unsteekit the een oʼ the blinʼ, hae caused eʼen this man to leeve?”

³⁸ Jesus, groanin at this within his sel, comes to the tomb. Noo it was a cave, and a stane was putten ower it.

³⁹ Jesus said, “Tak ye awa the stane!” Martha, the sister oʼ the deid man, says, “Lord! by noo the corp wull be rank, for he has been fowr days deid!”

⁴⁰ Jesus says to her, “Did I no say tʼye, that gin ye wad believe, ye soud see the glorie oʼ God?”

⁴¹ Than took they awa the stane. And Jesus liftit up his een, and said, “Faither! I thank thee that thou did hear me.

⁴² “And I ken that thou aye hears me; but for the sake oʼ aʼ the folk staunin here I said it, that they may ken that thou did send me.”

⁴³ And whan he had sae said, he cryʼt wiʼ a soondin voice, “Lazarus! hither! Come!”

⁴⁴ And the deid cam forth, bund haun and fit wiʼ deid‐claes; and his heid bund roond wiʼ a naipkin. Jesus says to them, “Lowse him, and lat him gang!”

⁴⁵ Than a hantle oʼ the Jews wha cam to Mary, and saw aʼ that he did, believed on him;

⁴⁶ But a wheen oʼ them gaed their gate to the Pharisees, and tellʼt them what Jesus had dune.

⁴⁷ The Heigh‐priests and the Pharisees than gaitherʼt a Cooncil; and quoʼ they, “What are we to do? for this man dis mony wunner‐warks.

⁴⁸ “Gin we lat him thus be, aʼ folk wull lippen to him; and the Romans wull come, and tak’ awa oor place and oor kintra frae us!”

⁴⁹ But ane oʼ them, Caiaphas, he bein Heigh‐priest that year, said to them, “Ye ken naething ava!

⁵⁰ “Nor tak intil accoont, that it is better for us that ae man soud dee for the nation, and no that the hail nation soud be cuttit aff!”

⁵¹ Noo this he spak, no oʼ his ain sel; but bein Heigh‐priest that year, he foretauld that Jesus soud dee for the nation:

⁵² And no for that nation allenarlie; but that he soud gather thegither in ane aʼ Godʼs bairns scatterʼt abreid.

⁵³ Sae, frae that day forrit, they plottit thegither to mak awa wiʼ him.

⁵⁴ Sae Jesus gaed nae mair freely amang the Jews; but gaed awa intil the kintra‐side nar‐haun the wilderness, intil a city caʼd Ephraim; and bade thar, wiʼ his disciples.

⁵⁵ Noo the Jewsʼ Pasche was nar‐haun; and mony gaed up frae aʼ the kintra‐side to Jerusalem afore the Pasche, to purify their sels.

⁵⁶ Than socht they for Jesus; and quoʼ they amang their sels, as they stude iʼ the Temple, “What think ye? wull he no come up to the Feast?”

⁵⁷ Noo baith the Heigh‐priests and the Pharisees had gien a commaun, that gin ony ane kent whaur he was, he soud schaw it, that they micht grip him.