James 5 - New Testament in Braid Scots 1904 (William Wye Smith)

CHAPTIR FYVE. A bode for patience and faith. The teachins oʼ Natur; and the experience oʼ men, are aʼ on the ae side!

¹ Awa noo, ye rich! wail ye and cry, for the dool that is comin on ye!

² Yere gear has roustit; yere cleedin is moth‐eaten;

³ Yere gowd and yere siller are roust‐eaten, and their roust sal witness again ye, and sal eat yere flesh as fire. Ye hae laid‐up treasur for the Last Day!

⁴ Tak tent! the penny‐fee oʼ the workers, wha cuttit doon yere fields, and has by you been keepit back by dishonesty, is crying oot: and the cries oʼ thae that shure are enterʼt intil the hearin oʼ the Lord oʼ Hosts.

⁵ Ye leeved wanton on the soil, and rioted; ye pamperʼt yere hearts, as for the day oʼ slauchtir!

⁶ Ye condemned, ye killed the Richtous Ane; and he resists‐ye‐na.

⁷ Thole patiently, than, brethren! till the Lord be amang ye. Behauld, the tiller is waiting for the precious frutes oʼ the yirth, and is patient wiʼ it, till it gets the early and the hinmaist rain.

⁸ Thole ye patiently, as weel! strenthen yere hearts; for the comin oʼ the Lord draws on!

⁹ Yammer‐na, brethren, again ane anither, least ye be judged: See! the Judge stauns fornent the door.

¹⁰ Tak ye, brethren, for yere likeness oʼ sufferan and patience, the Prophets that spak iʼ the name oʼ the Lord.

¹¹ Look! we caʼ thae happy wha tholed. Oʼ Jobʼs patience ye hae heard; and the end the Lord had in view ye saw: that the Lord is oʼ muckle tender‐love, and fuʼ oʼ compassion.

¹² But aboon aʼ things, my brethren, sweer‐na; aither by the heeven or the yirth, or by ony ither aith: but lat yere “aye” be “aye,” and yere “na” be “na”; least ye faʼ under judgment.

¹³ Is ony afflictit amang ye? lat him be prayin! Is ony blythe? lat him sing wiʼ harp!

¹⁴ Is ony ill amang ye? lat him caʼ till him the kirk elders; and lat them pray ower him, anointin him wiʼ oyle iʼ the name oʼ the Lord.

¹⁵ And the faithfuʼ prayer sal save the dwinin ane, and the Lord wull raise him up: and gin aiblins he has sinned, it sal be forgien him.

¹⁶ Sae confess ye ane to anither yere sins; and pray ye ilk for ither, to the end that ye may be healed. Muckle avails the prayers oʼ a richtous man in its ootcome.

¹⁷ Elijah was a man, oʼ like natur wiʼ us; and wiʼ mickle prayer prayed he that thar soud be nae doonfaʼ; and thar was nae weet on the grunʼ for thrie year and a hauf;

¹⁸ And again prayed he, and the lift gaʼe rain, and the yirth brocht forth her frute.

¹⁹ My brethren, gin aiblins ony ane amang ye mis‐airts his way frae the truth, and anither convert him,

²⁰ Lat him ken, that he that turns a sinner frae the error oʼ his ways, sal save a saul frae death, and gets coverʼt ower an unco wheen sins.