James 1 - New Testament in Braid Scots 1904 (William Wye Smith)

CHAPTIR ANE. James tells what true faith wull do in aneʼs life. Gin aʼ wud dae sae, what a bonnie warld we wad hae!

¹ James, a servant oʼ God, and oʼ the Lord Jesus Christ, tae the Twalʼ Tribes oʼ the Dispersion; joy!

² Aʼ joy coont it, my brethren; whan ye come intil mony trials.

³ Comin to ken that the testin oʼ yere faith works oot lang‐tholin.

⁴ But let lang‐tholing hae its perfeteness, sae as ye may be perfete and complete, wanting in naething.

⁵ Gin ony oʼ ye want wisdom, lat him be seekin frae God, wha gies in rowth till aʼ, and wytes‐na; and it sal be gien him.

⁶ But lat him seek in faith, wiʼ nae switherin; for he wha has switherin doots, is like a sea‐wave, caʼd wiʼ the wind, and tossʼd wiʼ the storm.

⁷ For lat‐na siccan a man think he sal hae onything oʼ the Lord:

⁸ He, wiʼ a twafauld mind, unsiccar in aʼ his ways!

⁹ Lat the lowly brither joy at his uplifting;

¹⁰ But the rich in his bein brocht laigh; for, as the bloom oʼ the gerss he is to pass awa.

¹¹ For uprises the sun, wiʼ its birsʼlin heat, and birsles the gerss; “and its blume faʼs awa,” and the ee‐sweetness and beauty oʼ its face is gane! eʼen sae the rich man dwines awa in his ways.

¹² Happy he wha tholes trial! for, sae being appruvʼt, he sal hae a croon oʼ Life, promised oʼ the Lord to thae that loʼe him!

¹³ Lat nae ane, whan under trials, sae, “I am tempit oʼ God!” for God is naither tempit wiʼ sin, nor sae tempts he ony ane.

¹⁴ But ilk ane is tempit, whan by his ain desires he is wheedlʼt awa and enticed.

¹⁵ And the desire, haein conceived, brings forth sin; but the sin, whan aʼ is dune, brings forth death!

¹⁶ Be‐ye‐na deceivʼt, brethren belovʼd!

¹⁷ Ilka gude grant, and ilka perfetit gift is frae Aboon, comin doon frae the Faither oʼ lichts; wiʼ wham is nae unsiccarness, nor shadow oʼ gaun back.

¹⁸ Oʼ his ain wull begat he us wiʼ the word oʼ truth, that we soud be like first‐frutes oʼ his creation.

¹⁹ Ye ken this, my brethren belovʼd! But let ilka man be gleg to hear, backwart to speak, refusin to be angʼerʼt.

²⁰ For manʼs angʼer works‐na‐oot Godʼs richtousness.

²¹ Sae than, pittin by aʼ vileness and owercome oʼ wickedness, tak till ye in meekness the inborn word, that is able to save yere sauls.

²² But become ye word‐doers, and no word‐hearers alane, deceivin yere ain sels.

²³ For, gin ane is a word‐hearer, and no a word‐doer, he is but like a man seein his born face in a keekin‐gless.

²⁴ He sees his sel, and awa he is gane: and belyve he minds‐na what sort he was like!

²⁵ But he wha obteens a closer sicht intil a better and perfete rule, a rule oʼ libertie, and taks aye heed thare‐till, bein no a hearer forgettin, but a wark‐doer, this ain is blessʼt in his doin.

²⁶ Gin ony ane thinks to be doin religious service, and commauns‐na his tongue, but mislippens his ain heart, this aneʼs religious service is nocht ava.

²⁷ The service oʼ religion, pure and perfete afore oor God and Father is this: To be visitin faitherless and widows iʼ their dool, to keep his sel unstained frae the warld.