Hebrews 8 - New Testament in Braid Scots 1904 (William Wye Smith)

CHAPTIR AUCHT. Christʼs priesthood heigher nor Aaronʼs; and the Gospel wider nar the auld covenant.

¹ But, as bringing to a point what we hae said: Siccan a Heigh‐Priest hae we as this, wha is set on the richt haunʼ oʼ the thron oʼ The Majestie iʼ the Heevens;

² Oʼ the Holie Place, and oʼ the true tabernacle, whilk the Lord pitched, and no a man.

³ For ilka Heigh‐priest is ordeened for the offerin oʼ baith gifts and sacrifeeces; and it was necessar for this ane too, that he soud hae that whilk he micht offer.

⁴ Gin than the Lord had been on yirth, he hadna been a priest ava; sinʼ thar are thae, offering the gifts conform to the “Law.”

⁵ Wha eʼen, as a glint and shadow oʼ heevenlie things, are doin service; eʼen as Moses had word whan aboot to finish the tabernacle: “For tak tent,” says he, “that ye mak aʼ things conform to the paittern schawn to ye iʼ the mount.”

⁶ But noo has he obteened a mair noble ministry, by as muckle as he is the Mediator oʼ a heigher covenant, whilk is established on heigher promises.

⁷ For gin the first had been perfete, nae need wad thar hae been for a second.

⁸ For as wytin them, he says, “Tak tent! the days come, says the Lord, that I wull mak wiʼ the hoose oʼ Israʼl and the hoose oʼ Judah a new covenant.

⁹ No conform to the covenant I made wiʼ their forbears, iʼ the day I took them by the haun, to lead them oot oʼ the land oʼ Egypt; for it was that they bade‐na iʼ my covenant, and I disregairdit them, says the Lord.

¹⁰ “But this is the covenant I wull covenant wiʼ Israʼlʼs hoose eftir thae days, says the Lord, I wull pit my laws iʼ their minds, and write them on their hearts; and I wull be to them for a God, and they sal be for me a folk.

¹¹ “And nae need, ilk ane to teach his marrow, or ilk ane his brither, sayin, ‘Ken ye the Lord!’ for aʼ they sal ken me, frae the smaʼest to the greatest oʼ them.

¹² “For I wull be mercifuʼ to their unrichtousness, and oʼ their sins will I be mindfuʼ nae mair!”

¹³ By this word, “A new covenant,” he made the first ane “auld”: but what is made past use and auld, is passin awa.