Hebrews 6 - New Testament in Braid Scots 1904 (William Wye Smith)

CHAPTIR SAX. The awfuʼ state oʼ thae that faʼ back. But God is strang and faithfuʼ to susteen!

¹ Thar‐for, lat us leaʼ thir beginnins oʼ the things oʼ Christ, and gang on toward fuʼ growth; no layin ower again the fundation oʼ turning frae deid warks, and oʼ faith toward God.

² Oʼ the teachin anent bapteezins, and oʼ layin‐on oʼ hauns, and oʼ the Risin frae‐the‐deid, and oʼ eternal judgment.

³ And this wull we do, gin at least God permit.

⁴ For it isna possible, as to thae wha ance had licht, and had preed the free‐gift oʼ Heeven, and had been made to partak oʼ the Holie Spirit.

⁵ And had preed the sweet word oʼ God, and the pooers oʼ the warld to come, —

⁶ And then faʼin awa, ance mair to new‐form them until repentance; seein they are crucifyin ower again to their sels the Son oʼ God, and makin a public shame oʼ him!

⁷ For the grund, that sooks in the aft‐faʼin rain, and brings forth what they wad fain hae wha till it, receives blessin frae God;

⁸ But gin it bear thorns and briers, it is no esteemed, and is nar‐haun bein cursʼt; whase end is to be brunt.

⁹ But we are perswadit better things oʼ you, beloved, eʼen things oʼ salvation, thoʼ we div sae speak.

¹⁰ For God is no ill‐deedie to be forgettin yere wark and love that ye schawed forth for his name; in serʼin the saunts, and still serʼin.

¹¹ But we hae mickle desire that ilk ane oʼ ye schaw forth the same perseverin, to the fuʼ confidence oʼ hope, eʼen tae the end.

¹² That ye be‐na slack, but followin on eftir thae wha by faith and long‐tholin fell heirs to the promises.

¹³ For whan God made promise to Abraʼm, seein thar war nane greater to sweer by, he swure by his sel,

¹⁴ Sayin, “Certes, in blessin wull I bless thee; and in multiplyin wull I multiply thee!”

¹⁵ And sae, tholin patiently, he gat the promise.

¹⁶ For men sweer by ane greater; and wiʼ them an aith is the end oʼ aʼ disputin.

¹⁷ And sae God, bein muckle mair willin to schaw forth to the heirs oʼ the promise the siccarness oʼ his coonsel, cam in wiʼ an aith.

¹⁸ For by twa unchangeable things, in whilk it wasna possible for God to be fause, a stieve consolation we soud hae, wha fled to grip the hope set afore us;

¹⁹ Whilk hope we hae as an anchor oʼ the saul, baith siccar and sure, and comin ben within the veil.

²⁰ Whaur Jesus, as fore‐rinner for us, has enterʼt; wha “was made a Heigh‐priest for aye, iʼ the order oʼ Melchizedek.”