Hebrews 5 - New Testament in Braid Scots 1904 (William Wye Smith)

CHAPTIR FYVE. Christ, the great Heigh‐Priest; the first and the last oʼ his Order!

¹ For ilka Heigh‐priest, taen frae among men, is appointit for things oʼ God, that he may offer baith gifts and sacrifeeces for sins;

² As ane wha can marrow weel in his heart wiʼ thae that are ignorant and gane aside; sinʼ he his sel is rinkit roonʼ wiʼ weakness;

³ And on this accoont he bude for his sel, sae for the folk, to be offerin for sins.

⁴ And nae man taks to him this honor, but is caʼd by God, eʼen as Aaron was.

⁵ And sae, eʼen Christ magnifyʼt?-?na himselʼ to be made a Heigh‐priest; but raither it was he that spak to him, sayinʼ “My Son art thou; this day hae I begotten thee.”

⁶ Eʼen as in anither place he says, “Thou, a Priest for aye, iʼ the order oʼ Melchizedek.”

⁷ Wha, iʼ the days oʼ his flesh, eftir offerin up prayers and entreaties to him wha was strang to save him frae death, wiʼ sair ootcries and tears; and had been heard for his godly fear.

⁸ Eʼen thoʼ he was a Son, yet learned he obedience by the things that he tholed;

⁹ And bein perfetit, becam to aʼ thae obeyin him the fundation oʼ an endless salvation;

¹⁰ Haein been addressed by God himsel as “Heigh‐Priest, iʼ the order oʼ Melchizedek.”

¹¹ Anent wham we hae muckle to say, and are sair beset hoo to say it, seein ye are become feckless in hearin.

¹² For, eʼen whan ye soud hae come to be teachers iʼ the lapse oʼ time, ye hae need ance mair that ane be teachin you the vera elements oʼ the first principles oʼ the oracles oʼ God; and are gotten to be sic as hae need oʼ milk and no oʼ manʼs meat.

¹³ For ilka ane takin milk wants skill iʼ the word oʼ richtousness; for he is a wean:

¹⁴ But tae sic as are man‐grown, pertains manʼs meat; to thae wha throwe proper use, hae their pooers exerceesʼt to discern baith gude and ill.