Hebrews 4 - New Testament in Braid Scots 1904 (William Wye Smith)

CHAPTIR FOWR. The ever‐bidin rest oʼ God is still to the fore for the believer.

¹ Lat us than hae fear, least at ony time — thoʼ thar be a promise left oʼ enterin intil his Rest — ony frae ʼmang ye soud come short oʼt.

² For to us has the Joyfuʼ‐message been gien, eʼen as to them; but the word oʼ their hearin did them nae gude, they no makin their sels ane in faith wiʼ thae that hearkenʼt.

³ For we that hae had faith div enter intil the Rest; conform to what he has said, “As I did sweer iʼ my wrath, they sanna enter intil my Rest!” thoʼ the warks war aʼ endit frae the fundation oʼ the yirth.

⁴ For he has said in a place, anent the seeventh day, thus: “And God restit on the seeventh day, frae aʼ his warks.”

⁵ And in this place again, “Gif they sal enter intil my Rest!”

⁶ Sae, seein it is left ower for some to enter intilʼt, and they wha afore had the Joyfuʼ‐message deliverʼt to them enterʼt‐na in, on accoont oʼ thrawartness.

⁷ He still marks oot a certain day, sayin by Dauvid — eʼen eftir sae lang a time as that — juist like as it had been said afore: “The day, gin aiblins ye hear his voice, mak‐na hard yere hearts!”

⁸ For gin Joshua had gien “Rest” to them, he wadna iʼ that case hae been speakin, eftir thae things, oʼ anither day.

⁹ Sae thar is bein left ower a Sabbath‐keepin for aʼ the folk oʼ God!

¹⁰ For he that enterʼt intil his rest, he eke has restit frae aʼ his warks, as God did frae his.

¹¹ Lat us than gie aʼ tent to enter intil that “Rest”; least ony ane faʼs, iʼ the same example oʼ thrawartness.

¹² For Godʼs word is leevin and michty, keener nor a twa‐edged sword, thringin throwe to the pairtin oʼ saul and spirit, oʼ joints and marrow; and gleg at discernin the airtins and ettlins oʼ the heart.

¹³ And thar isna a creatit thing that can be hidden frae his sicht; but aʼ things are nakit and laid bare to the een oʼ him wham we hae to do wiʼ.

¹⁴ Haein than a great Heigh‐Priest, wha has gane up throwe the heevens, Jesus, the Son oʼ God, lat us haud siccar oor confession!

¹⁵ For we haena a Heigh‐Priest that hasna a brither‐feelin wiʼ oor weaknesses; but ane wha was tempit in aʼ the likeness oʼ oorsels, yet wantin sin.

¹⁶ Lat us, than, draw nar wiʼ freedom oʼ speech to the thron oʼ tender‐love; that we may obteen mercie, and find favor to help us in oor need!