Hebrews 13 - New Testament in Braid Scots 1904 (William Wye Smith)CHAPTIR THIRTEEN. A wheen gude coonsels at the hinner‐end; and salutations oʼ the Apostle. 1 Lat britherly love aye staun. 2 Forget‐na to enterteen fremd anes; for sae some hae takin to them Angels, unkent. 3 Bear in mind thae that are in bonds, as bein in bonds wiʼ them; and thae dreein ill‐treatment as eʼen yersels bein iʼ the body. 4 Lat mairriage be hauden in honor oʼ aʼ, and lat the bed be pure; for lecherers and adulterers God wull judge. 5 Lat yere life no be iʼ the way oʼ loeʼin siller; bein content wiʼ what ye hae; for he has said, “In naegate wull I leaʼ ye! Na, in naegate wull I forsake ye!” 6 Sae that, takin heart, we may say, “The Lord is my freend, and Iʼse be‐na fleyʼt; what sal man do to me?” 7 Keep in mind thae wha are airtin ye; wha speak to ye the words oʼ God; the ootcome oʼ whase life seein, follow ye their faith! 8 Jesus Christ, yestreen and the day the same, and for evermair! 9 Be‐na carryʼt awa wiʼ mony and and unco teachins, for it is graun to hae the heart made siccar wiʼ favor and love; no wiʼ meats, whaur‐in they that hae fashʼd theirsels hae gotten nae profit. 10 We hae an altar, oʼ whilk they hae nae richt to partak, wha serʼ iʼ the Tabernacle. 11 For the bodies oʼ thae beass whase blude is cairryʼt within the Holie Place by the Heigh‐priest, are brunt ayont the camp. 12 And sae Jesus, that he soud sanctify the folk wiʼ his ain blude, sufferʼt ayont the ports. 13 Lat us than gang oot to him ayont the camp, bearin miscaʼin for his sake! 14 For here we hae nae ever‐bidin Citie, but are seekin oor way till ane to come. 15 Throwe him, than, lat us be offerin‐up a “sacrifeece oʼ praise” aye to God; whilk is “the frute oʼ oor lips,” confessin to his name. 16 But, oʼ doin gude, and oʼ fellowship, forget na; for wiʼ sic sacrifeeces as thir, God is weel‐pleased. 17 Obey them that hae the airtin oʼ ye, and gie‐in to them; for they are takin tent for yere sauls, as haein an accoont to gie; that they may do siclike wiʼ joy, and no wiʼ dool; for that war nae profit for you! 18 Pray for us; for we are perswadin oorsels that we keep a gude conscience; in aʼ things ettlin to leeve honorably. 19 And muckle mair div I entreat ye to do siclike; that wiʼ aʼ the mair speed I may be restorʼt tʼye. 20 Noo the God oʼ peace, that led up frae amang the deid oor Lord Jesus, the Great Shepherd oʼ the sheep, throwe the blude oʼ the ever‐bidin covenant, 21 Mak ye perfete in ilka gude thing for the workin oʼ his wull, doin in ye that whilk is weel‐pleasin afore his face, throwe Jesus Christ: tae wham be glorie for evir and evir! Amen. 22 But I entreat ye, brethren, bear wiʼ the word oʼ coonsel; for eʼen wiʼ few words I wrate tʼye. 23 Ken‐ye‐na that oor brither Timothy is set free? wiʼ wham, gin he come sune, I wull see ye. 24 Salute aʼ thae that hae the airtin oʼ ye, and aʼ the saunts. They oʼ Italie salute ye. 25 Gude favor be wiʼ ye aʼ. Amen. |
Translated by Rev William Wye Smith. Published in Paisley, Scotland in 1904.
British & Foreign Bible Society