Hebrews 12 - New Testament in Braid Scots 1904 (William Wye Smith)

CHAPTIR TWALʼ. Haud ye on by faith! A graun Assembly weʼre comin till!

¹ Sae, seein we hae aʼ aboot us sic an unco clud oʼ witnesses — drappin ilka taiglement, and the dawtit sin that eithlie rinks us roond, lat us rin, perseverin, iʼ the race set afore us;

² Lookin‐awa till oor Leader?-?Prince and Perfeter, Jesus; wha for the joy held afore him, tholed the cross, and lichtlied the shame; and on Godʼs richt haun has taen his seat.

³ For, think ye oʼ him, wha has tholed sic gainsayin oʼ sinners again himsel, least ye be forfouchten, and yere sauls be faint.

⁴ Ye hae‐na yet resistit tae blude, battlin again sin!

⁵ And ye hae clean forgotten the avisement that speaks till ye as to bairns: “My son, lichtlie‐ye‐na the chastenin oʼ the Lord, naither faint ye when ye are repruvʼd oʼ him;

⁶ “For the Lord chastens the ane he loʼes, and lays stripes on ilka son he welcomes hame.”

⁷ For the experience‐sake, thole ye; for God deals wiʼ you as wiʼ sons; for wha is a son, and no exerceesʼd oʼ his faither?

⁸ But gin ye are ootside oʼ aʼ exerceese, oʼ whilk aʼ hae their portion, than are ye bastards and no “sons.”

⁹ And mair: faithers oʼ oor flesh had we to exerceese us, and we gied them reverence; sal‐we‐na muckle raither submit oorsels to the Faither oʼ oor spirits, and leeve?

¹⁰ They, certainlie, for a wheen days, exerceesʼd us, conform tae what seemed to them gude; but he conform tae what is best, that we micht partak oʼ his holiness.

¹¹ Yet nae exerceesin, for the time present, seems a blytheness, but a sorrow; natheless, eftirhaun, to thae wha hae been thar‐by exerceesʼd, it gies peacefuʼ frutes oʼ richtousness.

¹² Sae, “The feckless hauns and palsied knees rax oot;

¹³ “And mak straucht fit‐roads for yere feet”; that what is gleyʼd be‐na thrawn‐oot, but be raither made hale.

¹⁴ Follow peace wiʼ aʼ: and holiness; wantin whilk nae man sal see the Lord.

¹⁵ Takin tent gif thar be ony man faʼin ahint frae the tender‐love oʼ God, “least ony rute oʼ bitterness springin up” be makin bitterness, and sae mony corruptit:

¹⁶ Ony lecherer; or ony ungodly ane as Esau, wha for the sake oʼ ae meal oʼ meat, gied up his “first‐born” richt.

¹⁷ For ye ken that, eʼen aftir that was dune, he fain wad hae the blessin, but was rejeckit; for he faund nae turnin again, thoʼ he socht it wiʼ unco tears.

¹⁸ For ye hae‐na come to the lowin and devoorin fire, to mirk, and gloom, and tempest.

¹⁹ And a peal oʼ a bugle‐horn, and a sound oʼ spoken words; frae whilk thae wha heard pled no‐tae?-?hear‐them ony mair;

²⁰ For they couldna thole what was bein laid doon, “And, gin a beasʼ may touch the mountain, it maun be staned!”

²¹ And sae awesome was that whilk was seen, that Moses said, “I am unco fleyʼd; and trimle!”

²² But ye are come nar till Zionʼs mountain, and tae the Citie oʼ the Leevin God, a Heevenlie Jerusalem; and till hosts oʼ rejoicin Angels;

²³ And to God the Judge oʼ aʼ; and to the spirits oʼ richtous anes made perfete;

²⁴ And till a Mediator oʼ a new Covenant, Jesus; and to the strinklin oʼ blude, sair‐pleadin mair than Abel!

²⁵ Tak ye tent that ye rejeck‐na him that speaks! for gin they escapʼt?-?na wha rejeckit him wha on yirth was warnin them, hoo muckle less sal we escape, gin we turn oorsels awa frae him wha warns us frae Heeven!

²⁶ Whase voice did shake the yirth; but noo has he said, “Yet ance mair I wull shake, no the yirth alane, but heeven as weel!”

²⁷ And this: “ance mair” points to the takin awa oʼ thae things that can be shucken, as oʼ things that hae been formed; that thae may remain that canna be shucken.

²⁸ And sae, seein we are to hae a kingdom that canna be shucken, lat us hae lovin‐favor, that we may render service weel‐pleasin until God, wiʼ reverence and godly fear.

²⁹ For oor God is a devoorin fire.