Hebrews 11 - New Testament in Braid Scots 1904 (William Wye Smith)

CHAPTIR ELEEVEN. What faith is? and wha had it, and how they made it to be seen? A noble bead?-?roll.

¹ Noo faith is gruppin the substance oʼ things lookit for; the confidence oʼ raal‐things no yet seen.

² For thar‐in the Elders had gude‐witness borne them.

³ Throwe faith we come to ken the warlds war orderʼt by the words of God, sae as that whilk is seen was made oot oʼ what was seen‐na.

⁴ Throwe faith Abel offerʼt to God a mair perfete sacrifeece than Cain; by whilk he obteened testimonie that he was richtous, God testifying anent his gifts: and throwe it, though he deeʼt, he is still speakin.

⁵ Throwe faith Enoch was translatit sae as no to see death, and was seen‐na, for God had translatit him; for afore the translation he had testimonie borne to him that he had been weel‐pleasin to God.

⁶ But, wantin faith, it isna possible to be weel‐pleasin to him; for he that comes to God maun needs hae faith that he is, and that to thae that seek him a Rewarder is he.

⁷ Throwe faith Noah, being tellʼt oʼ things as yet no seen, wrocht‐on by godly fear, made ready an ark to the savin oʼ his hoosehauld; throwe whilk he condemned the warld, and becam heir oʼ the righteousness oʼ faith.

⁸ Throwe faith Abraʼm — he wha was tellʼt — obeyʼd to gang till a place he was to hae for a heritage; and gaed oot, no weel‐kennin whaur he was gaun.

⁹ Throwe faith he bade day‐by‐day iʼ the Land oʼ Promise, as in a fremd land; bidin in tents, wiʼ Isaac and Jaucob, joint‐heirs oʼ the same promise:

¹⁰ For he was waitin for the Citie wiʼ fundations, biggit, and planned by God.

¹¹ Throwe faith eʼen Sarah her sel had strength to conceive, whan she was ayont age: seein that she was haudin him as faithfuʼ that had promised.

¹² And sae, eʼen frae ane was thar born — and him as he war deid — “as mony as the starns oʼ the sky in their thrang, and as the sand by the lip oʼ the sea; no to be numberʼt.”

¹³ And conform to faith, deeʼt aʼ thir; no haen their sels grippit the promises, but seein them far awa, and salutin them, and confessin that they their sels war fremd anes, and lodgers on the yirth.

¹⁴ For they that say sic things, mak it plain to be kent that they are seekin a land oʼ their ain.

¹⁵ For gin they had been thinkin aye oʼ the land they came frae, they micht hae had opportunity oʼ returnin:

¹⁶ But noo they look for a better land, that is a heevenlie ane; whaur‐for God isna ashamed oʼ them to be socht till as their God; for he did prepare for them a Citie.

¹⁷ Throwe faith Abraʼm when he was testit, offerʼt up Isaac; aye, he wha blythely acceptit the promises, was offerin‐up his ae and only son;

¹⁸ Oʼ wham it was said, “Thar sal be caʼd a seed tae thee in Isaac.”

¹⁹ Reckonin that God could raise him again, eʼen frae ʼmang the deid; frae whilk he, in a likeness, wan him back again.

²⁰ Throwe faith Isaac gied blessin to Jaucob and Esau, speakin oʼ comin things.

²¹ Throwe faith Jaucob, whan he cam to dee, blessʼd baith the sons oʼ Joseph; and “worshippʼt, loutin doon on the heid oʼ his staff.”

²² Throwe faith Joseph, whan his end cam nar, spak oʼ the gaun oot oʼ the sons oʼ Israʼl, and gaʼe commaun anent his banes.

²³ Throwe faith Moses, whan he was born, was keepit hidlin thrie month, for that they saw he was an unco bonnie wean, and fearʼt‐na the orders oʼ the king.

²⁴ Throwe faith Moses, whan he was grown, wadna be caʼd “Son oʼ Pharaohʼs dochter”;

²⁵ Makin choice raither to dree wiʼ the folk oʼ God their ill‐treatment, than to be enjoyin for a wee the pleasurs oʼ sin.

²⁶ Reckonin the reproach oʼ the Anointit Ane as unco better than aʼ the gear oʼ Egypt; for he was lookin awa to the giean oʼ the reward.

²⁷ Throwe faith he left Egypt ahint, no fearin the angʼer oʼ the king; for he tholed, as behauldin him wha is unseen.

²⁸ Throwe faith he institutit the Pasche, and the strinklin oʼ blude; that he that destroyʼt the first‐born soudna be touchin them.

²⁹ Throwe faith they gaed athort the Red Sea as on dry grunʼ; whilk the Egyptians, ettlin to do, war whammlʼt ower.

³⁰ Throwe faith the waʼs oʼ Jericho fell doon, haein been rinkit roonʼ for seeven days.

³¹ Throwe faith Rahab the courtesan perishʼt‐na wiʼ thae that war disobedient, haein welcomed the spies wiʼ peace.

³² And what mair can I say? for time wad fail me tellin oʼ Gideon, Barak, Samson, Jephthah; oʼ Dauvid too, and Samuʼl, and the prophets;

³³ Wha, throwe faith prevailed ower kingdoms, wrocht richtousness, obteened promises, dang the mooth oʼ lions.

³⁴ Quenched the lowin oʼ fire, escapit the mooth oʼ the sword, frae fecklessness raise to strenth, waxʼt michty in war; turned to flicht armies oʼ fremʼd anes.

³⁵ Weemen gat back their deid, raisʼt to life; and some war tortured, no acceptin conditions oʼ deliverance, that they micht come to a better Risin‐again.

³⁶ Ithers war tried wiʼ mockins and clourins; aye, mair; wiʼ fetters and dungeons:

³⁷ They war staned, war sawn sindry, war tempit, war murderʼd wiʼ sword; they gaed aboot rowʼt in sheepskins and goat‐hides, bein in poortith, dool, and misery.

³⁸ The warld wasna wordie oʼ them; wanderin on muirlands and mountains, bidin in dens and caves oʼ the yirth.

³⁹ And thir aʼ, thoʼ they had witness to their faith, obteenʼd‐na, their sels, the promise.

⁴⁰ God haein aforehaun providit better things for us, that no sindry frae us soud they be perfetit.