Hebrews 1 - New Testament in Braid Scots 1904 (William Wye Smith)

CHAPTIR ANE. Christ far aboon Angels, and creatit things.

¹ Whaur‐as, in a hantle oʼ portions and in a hantle oʼ ways, in auld times, God spak to the faithers by the prophets,

² At the hinner‐end oʼ thir days he speaks to us by his Son; wham he set forrit for an heir oʼ aʼ things; and throwe wham he made the warlds.

³ Wha, bein the radiant brichtness oʼ glorie, and a perfete likeness oʼ his sel, and uphaudin aʼ things by the word oʼ his pooer — haen made a purifyin oʼ oor sins — sat doon on the richt haun oʼ the Majestie on Heigh;

⁴ By sae mickle bein his sel aboon the Angels, as he has inheritit a name that is far aboon their ain.

⁵ For to whilk oʼ the Angels said he at ony time, “My Son art thou; this day hae I begotten thee”? And again, “I wull be a Faither to him; and he sal be a Son to me”?

⁶ But at sic a time again as he soud send the First‐Begotten into the warld, he says, “And lat aʼ the Angels worship him!”

⁷ And oʼ the Angels he says, “Wha maks his Angels be winds, and his servitors flauchts oʼ fire.”

⁸ But anent the Son — “Thy thron, O God is to aʼ ages; and the sceptre oʼ thy kingdom is a sceptre oʼ richtousness!

⁹ “Thou hast loʼed richtousness, and scunnerʼd at ill; and for this God has anointit thee wiʼ the oyle oʼ gladness aboon thy marrows!”

¹⁰ And, “Thou, Lord, at the fore‐end, did set the fundation oʼ the yirth; and the heevens are the warks oʼ thy hauns.

¹¹ “They sal dwine awa; but thou bides for aye! And they aʼ, as a wearin‐dud, sal end;

¹² “And, as a maud sal thou fauld them up; and theyʼse be changed; but thou art aye the same, and thy years end‐na!”

¹³ But to whilk ane oʼ the Angels has he said at ony time, “Sit thou at my richt haun, till I mak thy faes the fit‐brod oʼ thy feet?”

¹⁴ Are‐na they aʼ waitin spirits, sent oot to wait on thae that sal inherit salvation?