Galatians 6 - New Testament in Braid Scots 1904 (William Wye Smith)

CHAPTIR SAX. Hoo to walk, and what to glorie in.

¹ Brethren, gin aiblins a man be betrayʼt intil a faut, ye wha are spiritual recover sic a ane iʼ the spirit oʼ canniness; lookin to yersel, least ye yersel be tempit.

² Uphaud ye ane anitherʼs burdens, sae sal ye perform the Law oʼ Christ.

³ For gin a man thinks he is something, whan he is naething, he is but deceivin his sel in his ain mind.

⁴ But lat ilka man test his ain wark; and than sal he hae pleasur in himsel allenarlie, and no in what anither thinks.

⁵ For ilka man sal cairry his ain back‐burden.

⁶ Nane‐the‐less, lat him that is instructit iʼ the Word hae fellowship wiʼ him that instructs, in aʼ gude things.

⁷ Dinna deceive yer sels; God isna to be mocked; for what a man saws, the same sall he shear;

⁸ For he that saws till his ain flesh, oot oʼ the flesh sal hae corruption; but he wha saws to the Spirit, oot oʼ the Spirit sal hae Life‐for‐aye.

⁹ But in doin what is weel, lat us no be cuisten‐doon; for in due time we sal reap, gin we gie‐na‐up.

¹⁰ Sae than, eʼen as we hae openins, lat us work what is gude toward aʼ men, special toward the hoosehauld oʼ the Faith.

¹¹ (See wiʼ sic muckle letters I wrate tʼye, wiʼ my ain haun!)

¹² As monie as wad mak a bonnie schaw iʼ the flesh, they wad gar ye be circumceesed, only that they soudna dree persecution for the Cross oʼ Christ.

¹³ For no eʼen they wha hae become circumceesed are their sels observin the Law, but they wad hae ye circumceesed, that they micht boast theirsels in your flesh.

¹⁴ But wiʼ me, lat it be far frae boastin, gin it be‐na in the cross oʼ oor Lord Jesus Christ, throwe wham the warld to me is crucifyʼt, and I to the warld.

¹⁵ For in Christ Jesus naither circumceesion is onything, nor uncircumceesion, but a new creation.

¹⁶ And till as mony as are gaun on by this rule, peace and mercy on them, and on the Israʼl oʼ God!

¹⁷ For the lave, lat nane gie me fash; for I bear aboot in my body the brands oʼ the Lord Jesus!

¹⁸ Oor Lord Jesus Christʼs favor wiʼ yere spirit, brethren! Amen!