Galatians 5 - New Testament in Braid Scots 1904 (William Wye Smith)CHAPTIR FYVE. The freedom oʼ love. The warks oʼ the Spirit, and the warks oʼ the flesh. 1 Wiʼ freedom Christ maks us free: staun ye steive than, and be‐na hauden fast wiʼ ony yoke oʼ bondage! 2 Tak tent! I Paul say tʼye, that gin ye receive circumceesion, Christ wull profit ye nocht. 3 But I witness to ilka man again that receives circumceesion, that he is a bund debtor to the hail Law. 4 Ye are set aside frae Christ, ye wha wad be justifyʼt iʼ the Law: ye are faun awa frae his favor. 5 For we throwe the Spirit, are fain waitin for the hope oʼ richtousness. 6 For in Christ Jesus, naither circumceesion coonts for ocht, nor uncircumceesion; but faith, wrocht inwardly by love. 7 Ye gaed weel; wha taiglʼt ye, that ye soudna comply wiʼ the truth? 8 This compliance wasna oʼ him wha caʼd ye! 9 A wee barm wull gang throwe the hail melder. 10 I am perswadit oʼ ye iʼ the Lord, that ye winna be thrawart; but he that fashes ye sal dree his weird, whaeʼer he may aiblins be. 11 But I, brethren, gin I be preachin circumceesion, why am I sae persecutit? for than had the bogle oʼ the “Cross” been dune awa. 12 I wad they eʼen wad cut aff their sels, that fash ye. 13 For ye war caʼd in freedom, brethren: but turn‐na yere freedom intil an indulgence to the flesh, but raither by yere love serʼ ye ane anither. 14 For the hail Law is bund up in ae word, this: “Ye sal loʼe yere neebor as yersel!” 15 But gin ye gansh at and devoor ane anither, tak tent that ye be‐na destroyʼt ane oʼ anither. 16 On the ither haun, I say, Walk ye iʼ the Spirit, and the wull oʼ the flesh ye sanna fulfil. 17 For the flesh has desires contrar to the Spirit, and the Spirit contrar to the flesh: for thir again ane anither are set; that ye may‐na do the things ye wad itherwise do! 18 But, gin than ye are led by the Spirit, ye are‐na under the Law. 19 But plain to be seen are the warks oʼ the flesh; whilk are adultery, lechery, wantonness, 20 Idolatry, divination, hatred, faʼin‐oot, jealousy, wrath, factions, pairties, 21 Envyins, bludeshed, druckenness, revellins, and siclike things; as to whilk I tell ye plainly, eʼen as I hae tellʼt ye afore, that they wha practeese sic things as thir sanna inherit Godʼs kingdom. 22 But the frute oʼ the Spirit is love, happiness, peace, lang‐tholin, canniness, gudeness, lealness, 23 Meekness, self‐guidin; again sic things as thir thar is nae law! 24 But they wha are oʼ Christ Jesus, hae crucifyʼt the flesh, wiʼ its desires and hankerins. 25 Gin we leeve by the Spirit, by the Spirit lat us eʼen be airtit. 26 Lat us no be seekin for vain glorie; challengin ane anither, envyin ane anither. |
Translated by Rev William Wye Smith. Published in Paisley, Scotland in 1904.
British & Foreign Bible Society