Galatians 3 - New Testament in Braid Scots 1904 (William Wye Smith)

CHAPTIR THRIE. Paul speirs why they left faith, and gaed to the “Law.”

¹ O glaikit Galations! wha cuist glamour ower ye, afore whase vera een Jesus Christ was clearly schawn as a crucifyʼt Ane?

² I wad but ken this frae ye, Wasʼt by the warks oʼ the Law that ye hae gotten the Spirit, or by the hearin oʼ faith?

³ Are ye sae glaikit? Eftir makin a beginnin iʼ the Spirit, are ye noo gaun to be perfitit iʼ the flesh?

⁴ Tholed ye sic things for nocht? (gin it yet be for nocht.)

⁵ He than that supplyʼt to ye the Spirit, and wrocht ferlies amang ye, did he it by warks oʼ the Law, or by hearin oʼ faith?

⁶ Eʼen as Abraʼm lippened God, and it was reckoned to him as richtousness.

⁷ Ken, than, that they oʼ faith, eʼen they are bairns oʼ Abraʼm.

⁸ And the Scriptur, lookin forrit to God justifyin the heathen throwe faith, announced aforehaun the Gude‐word to Abraʼm: “They sal be blest in thee; eʼen aʼ the Nations!”

⁹ Sae than, they oʼ faith are haein a blessin alang wiʼ faithfuʼ Abraʼm.

¹⁰ For as mony as are oʼ Law‐warks, are ʼneath a curse; for it is putten doon, “Accurst is ilka ane wha gangs‐na on in aʼ things iʼ the Buik oʼ the Law, to do them!”

¹¹ But that in Law, nae ane is hauden richtous wiʼ God, is plain; for, “The richtous ane sal leeve by faith!”

¹² But the Law isna “by faith;” on the contrar, “He wha dis them sal leeve in them.”

¹³ Christ redeemed us oot oʼ the curse oʼ the Law, bein made a curse on oor behauf: for it is putten doon, “Accurst is ilka ane hingin on a tree.”

¹⁴ Sae that to the Nations the blessin oʼ Abraʼm micht come, in Jesus Christ; that we soud hae the promise oʼ the Spirit by faith.

¹⁵ Brethren! humanly am I speakin; yet, a human covenant nae ane sets by, or adds to.

¹⁶ Noo, to Abraʼm war the promises spoken, and to his Seed. It disna say, “And to seeds,” as oʼ mony; but as oʼ ane, “And to thy Seed,” whilk is Christ.

¹⁷ But say I, A covenant eʼen afore made siccar by God, the Law (whilk eftir fowr hunner and thretty years cam in), disna pit by, that it soud mak the promise feckless!

¹⁸ For gin aiblins the inheritance is “by Law,” it is nae langer “by promise;” but to Abraʼm, by promise, had God bestown it.

¹⁹ Why, than, the “Law”? For the cause oʼ sin it was addit, till siccan a time as the Seed, to wham it was promised, soud come; whilk Law was gien in chairge by messengers, at the haun oʼ a Mediator.

²⁰ But the Mediator isna oʼ ane; but God is ane.

²¹ Was the Law, than, contrar to the promises oʼ God? Far frae it! for gin a law war gien that had pooer to gie life, truly, than, by Law soud hae been richtousness.

²² But the Scriptur steekit up aʼ things as aneath sin, that the promise by faith in Jesus Christ soud be gien to thae that hae faith.

²³ But afore faith cam, we war keepit siccar ʼneath the Law; shut in to the faith aboot to be made kent.

²⁴ Sae that the Law has been oor bairn‐keeper to tak us to Christ, that we soud, throwe faith, be declarʼt richtous.

²⁵ But, faith haein come, we are nae mair aneath a bairn‐keeper.

²⁶ For ye are aʼ sons oʼ God throwe the faith in Jesus Christ.

²⁷ For ye, as mony as war bapteezʼt into Christ, hae putten on Christ.

²⁸ Thar isna to be said “Jew” nor “Greek”; thar isna to be said “bond” nor “free”; thar isna to be said “male” nor “female”; for aʼ ye, thegither, are ane in Christ Jesus!

²⁹ And, gin ye are Christʼs, than are ye Abramʼs seed; and heirs, eʼen as said the promise.