Galatians 1 - New Testament in Braid Scots 1904 (William Wye Smith)

CHAPTIR ANE. They had sune turned awa frae the plain faith. The Apostle challenges them forʼt.

¹ Paul, an Apostle, no frae men nor throwe men, but throwe Jesus Christ, and God the Faither wha raisʼt him frae amang the deid,

² And aʼ the brethren wiʼ me, to the Kirks oʼ Galatia:

³ The peace and gude favor oʼ God the Faither tʼye, and oor Lord Jesus Christ,

⁴ Wha gied his sel for oor sins, that he micht deliver us oot oʼ this present warld, whilk is an ill ane; conform to the wull oʼ oor God and Faither,

⁵ To wham be glorie for evir and evir. Amen!

⁶ I ferlie that thus sae sune ye are changin frae him wha perswadit ye intil Christʼs love, intil some ither “Gude‐word,”

⁷ Whilk indeed isna anither Gude‐word! But that are some wha are fashin ye, and wad damage the Gude‐word oʼ Christ.

⁸ But eʼen aiblins it soud be we, or an Angel frae Heeven, wha soud bring ye anither Gude‐word, differin frae what we gied tʼye, lat him be accursʼt!

⁹ As said we syne, sae say I noo again, Gin ony ane gies ye a “Gude‐word” differin frae what ye gat, lat him be accursʼt!

¹⁰ For, at this time, div I perswad men, or dis God? Or div I seek to please men? If aye I am pleasin men, Christʼs servant am‐I‐na!

¹¹ For I mak kent tʼye, brethren, as to the Gude‐work whilk was tellʼt by me; that it isna conform to men;

¹² For naither did I frae man obteen it, nor was I learned it by man, but throwe a revealin oʼ Jesus Christ.

¹³ For ye heard, as anent my mainner oʼ life at ae time, in Judaism, that in an unco way I persecutit the Kirk oʼ God, and laid it waste;

¹⁴ And was gaun on in Judaism ayont my marrows amang my ain folk, bein unco zealous for the traditions oʼ my forebears.

¹⁵ But wham it pleased God (wha took me sindry frae my mitherʼs womb, and invitit me by his grace),

¹⁶ To reveal his Son in me, that I soud deliver the Gude‐word regairdin him amang the heathen, at ance I coonsellʼt‐na wiʼ flesh and blude,

¹⁷ Nor gaed I up to Jerusalem to them that war Apostles afore me; but I gaed awa intil Arabia, and cam back again to Damascus.

¹⁸ Than, thrie years eftir, I gaed up to Jerusalem, to get acquant wiʼ Peter; and bade wiʼ him fyfteen days.

¹⁹ But oʼ the lave oʼ the Apostles saw I nane, but James, the brither oʼ the Lord.

²⁰ Noo, as to whatna things I am tellin ye, tent ye! in presence oʼ God, I am‐na speakin fause.

²¹ And syne, I gaed intil the kintra oʼ Syria and Cilicia.

²² Forby, I wasna kent by face to the Kirks oʼ Judea whilk are in Christ.

²³ Only they war hearin, “He wha was persecutin us at ae time, is noo preachin the Joyfuʼ‐message oʼ the faith that ance he laid waste!”

²⁴ And they magnifyʼt God in me.