Ephesians 6 - New Testament in Braid Scots 1904 (William Wye Smith)

CHAPTIR SAX. Bairns, and servants, and maisters: and they aʼ need the prufe‐coat oʼ Faith.

¹ Ye bairns, be dutifuʼ to yere ain parents, iʼ the Lord; for this is bonnie.

² “Honor thy faither and thy mither” (whilk indeed is the first commaun wiʼ a promise);

³ “That it may gang weel wʼye, and ye may leeve lang on the yirth.”

⁴ And ye faithers, dinna wauken‐up angʼer in yere bairns; but rear them up iʼ the chastenin and admonishin oʼ the Lord.

⁵ Ye servants, mind yere maisters iʼ the flesh, wiʼ reverence and trimlin, in aefauldness oʼ yere heart, as to Christ!

⁶ No by way oʼ ee‐service, as man‐pleasers, but as Christʼs servitors, doin Godʼs wull frae the heart;

⁷ Wiʼ gude‐wull doin service, as to the Lord, and no to men:

⁸ Kennin that ilk ane, whatna gude he may dae, eʼen that sal he hae back again frae the Lord — gin he be bond or free.

⁹ And ye, maisters, div ye the like things to them, kennin that their Maister and yourʼs is in Heeven; and thar is nae respectin oʼ faces wiʼ him.

¹⁰ And for the lave oʼt — Be ye strang iʼ the Lord, and iʼ the pooer oʼ his micht!

¹¹ Pit ye on the hail graith oʼ God, sae as ye may be fit to staun again the wiles oʼ Sautan.

¹² For oor struggle isna again flesh and blude, but again the pooers, again the authorities, again the warld‐rulers oʼ this mirkness; again the spiritual hosts oʼ ill iʼ the lift.

¹³ Whaur‐for tak to ye the hail graith oʼ God, that ye be strang to withstaun iʼ the ill day; and, haein dune aʼ things, to staun.

¹⁴ And sae staun! beltit aboot the mids wiʼ truth, and haein put on the prufe‐coat oʼ holiness;

¹⁵ And shod yere feet wiʼ the readiness oʼ the Gude‐word oʼ Peace;

¹⁶ And wiʼ aʼ, takin up the shield oʼ faith, in whilk ye hae pooer to kep aʼ the lowin shafts oʼ the Ill‐ane.

¹⁷ And the heid‐piece oʼ salvation tak ye; and the sword oʼ the Spirit, whilk is whatsoeʼer God has spoken.

¹⁸ Wiʼ aʼ prayer and pleadin, prayin aye iʼ the Spirit; and watchin iʼ the same, wiʼ aʼ tholin and pleadin, for aʼ the saunts;

¹⁹ And for me, that to me soud be gien utterance, that wiʼ freedom oʼ speech I may mak kent the Gude‐wore;

²⁰ For sake oʼ whilk I am like an ambassador in a chain; that in sic behauf I may be bauld to speak, as I soud speak.

²¹ But that ye may ken things regairdin me, Tychicus, the weel‐loʼed brither, and leal servant oʼ the Lord, wull mak aʼ things kent tʼye:

²² Wham I send to ye for this vera purpose, that ye micht come to ken oor state, and that he micht console yere hearts.

²³ Peace to the brethren, and love, wiʼ faith, frae God the Faither and the Lord Jesus Christ.

²⁴ Tender love be wiʼ aʼ thae that loʼe oor Lord Jesus Christ wiʼ lealness!