Ephesians 3 - New Testament in Braid Scots 1904 (William Wye Smith)

CHAPTIR THRIE. The graun secret oot, that the nations war aʼ welcome to Salvation! The wondrous Love oʼ Christ.

¹ And sae I, Paul, prisoner oʼ Christ Jesus for you the Gentiles,

² Gin at least ye hae heard oʼ the stewardship oʼ the grace oʼ God whilk was gien to me for you,

³ That by way oʼ revelation was made plain to me the hidden secret, eʼen as I wrate afore in a wee wheen words,

⁴ As to whilk ye may be able, by readin, to ken my knowledge oʼ the hidden secret oʼ Christ,

⁵ Whilk knowledge in the generations by‐gane wasna made kent to the sons oʼ men, as it is noo made plain to his holie Apostles and Prophets iʼ the Spirit —

⁶ That they oʼ the nations soud be aiqual heirs, and aiqual body, and aiqual pairtners iʼ the promise in Christ Jesus, by the Gude‐word.

⁷ Oʼ whilk I was made a servitor, as by the free gift oʼ the tender‐love oʼ God, gien to me, conform to the workin oʼ his pooer:

⁸ To me, wee‐er than the wee‐est oʼ aʼ saunts, was gien this gude‐favor, to bring to the nations the Gude‐word oʼ the uncoontit riches oʼ Christ.

⁹ And to gie licht as to what is the fellowship oʼ the secret quaisten that has been hid awa frae the former time in God, wha made aʼ things.

¹⁰ Sae that noo micht be made kent to heevenlie pooers and authorities throwe the Kirk, the mony‐fauld wisdom oʼ God.

¹¹ Conform to the ever‐bidin purpose he ettled in Christ Jesus oor Lord,

¹² In wham we hae bauldness oʼ speech, and oʼ approach, wiʼ assurance, throwe oor faith in him.

¹³ Sae, desire I, that ye swarf‐na at my sorrows for you: whilk indeed are your glorie.

¹⁴ And for this I bend my knees to the Faither,

¹⁵ Frae wham the hail family iʼ heeven and yirth is named,

¹⁶ That he wad gie you, conform to the richness oʼ his glorie, wiʼ aʼ pooer to hae micht iʼ the inwart man,

¹⁷ To hae Christ dwallin throwe faith iʼ yere hearts;

¹⁸ Rutit and grundit, that ye may be strang to grip siccar, wiʼ aʼ ither saunts, what is the breidth and lenth, and heighness and deepness,

¹⁹ And to come to ken the love oʼ Christ, ayont aʼ tellin, that ye may be fuʼ wiʼ the fuʼness oʼ God.

²⁰ Noo, to him wha has pooer ower aʼ things, to do uncolie and unmeasurably abone aʼ things we can seek or think, eʼen as his pooer works in us,

²¹ To him be the glorie, in the Kirk, and in Christ Jesus, to aʼ generations, and ages upon ages! Amen.