Ephesians 2 - New Testament in Braid Scots 1904 (William Wye Smith)

CHAPTIR TWA. Salvation the gift oʼ God. The fundation oʼ the sauntsʼ hope.

¹ And you, brocht to life, war deid in offences and sins;

² In whilk ye gaed in time by‐past, eʼen as in the way oʼ this warld, conform to the ruler oʼ the pooer oʼ the air, the spirit noo workin iʼ the bairns oʼ dourness;

³ Wiʼ wham eʼen we oorsels had oor life at ae time iʼ the fainness oʼ the flesh, obeyin the craikins oʼ the flesh and oʼ the thochts; and war bairns oʼ wrath by natur, eʼen as war the lave.

⁴ But God, plenteous in mercy, for his unco love he loʼed us wiʼ,

⁵ Eʼen thoʼ we war deid by oor sins, brocht us to life, alang wiʼ Christ (by tender‐love are ye saved!);

⁶ And wiʼ him raised us up, and wiʼ him gied us heevenlie seats, in Christ Jesus;

⁷ That he micht schaw iʼ the ages to come, the unco owergaun riches oʼ his love, in kindness to us in Christ Jesus;

⁸ For, it is by his love ye hae been saved, throwe faith; and this comes aboot, no frae you; it is Godʼs free gift.

⁹ No frae warks, least ony ane soud boast;

¹⁰ For his ain wark are we oorsels; bein formed in Christ Jesus for gude warks, whilk God afore made ready that we soud gang in them.

¹¹ Sae, keep ye in mind, that at ae time ye, Gentiles iʼ yere flesh, named “Uncircumceesion” by the sae‐caʼd “Circumceesion” in flesh, made wiʼ hauns;

¹² That ye war, at yon time staunin sindry frae Christ; bein fremd to the citizenship oʼ Israʼl, and bein strangers as to the covenants oʼ promise, wantin hope, and wantin God iʼ the warld!

¹³ But e‐noo, in Christ Jesus, ye wha war ance far‐awa, are made sib, in the blude oʼ Christ.

¹⁴ For he is the makin oʼ oor peace, wha made baith to be aye, and dang doon the dividin‐waʼ;

¹⁵ Haein, in his ain flesh, dune awa the hostility, and the law oʼ requirements in ordinances; that oot oʼ the twa he soud mak to his sel ae new‐formed man; makin peace.

¹⁶ And soud reconcile them baith perfetely in ae body to God, throwe the cross; slayin the hostility by the same:

¹⁷ And cam, and deliverʼt the Gude‐word oʼ “Peace to you oʼ the far‐awa, and peace to the nar at?-?haun.”

¹⁸ For it is throwe him we hae the comin‐in — we baith — iʼ the ae Spirit, to the Faither.

¹⁹ Sae than, ye are nae mair fremʼd‐folk and gangrels; but are marrows oʼ the saunts, and are oʼ the hoosehauld oʼ God.

²⁰ Bein up‐biggit on the fundation oʼ the Apostles and Prophets; Christ Jesus his sel the heid corner‐stane:

²¹ In wham the hail edifice iʼ the way oʼ bein fitly laid thegither, is growin to be a holie Temple oʼ the Lord.

²² In wham ye too are bein biggit thegither, intil a dwallin‐place oʼ God iʼ the Spirit.