Ephesians 1 - New Testament in Braid Scots 1904 (William Wye Smith)

CHAPTIR ANE. Paul uplifts God afore the Ephesians, and praises him for them, and for the graces they had.

¹ Paul, an Apostle oʼ Christ Jesus, throwe the wull oʼ God, to the saunts in Ephesus, and aʼ the leal anes in Christ Jesus:

² Lovin‐favor to ye, and peace, frae God oor Faither, and the Lord Jesus Christ!

³ Blessed aye, the God and Faither oʼ oor Lord Jesus Christ; wha blessʼt us in aʼ spiritual blessin on Heigh in Christ!

⁴ Conform to his acceptin us in him afore the up‐biggin oʼ the warld, that we soud be pure and wyteless in his presence;

⁵ In love settin us oot aforehaun for adoption oʼ bairns, by Jesus Christ to himsel, conform to the gude‐pleasur oʼ his wull,

⁶ To the praise oʼ the glorie oʼ his lovin‐favor, wiʼ whilk he favored us in the Beloved Ane:

⁷ In wham we hae salvation throwe his blude, the passin‐by oʼ offences, eʼen as by the richness oʼ his favor;

⁸ Whilk he garʼt to owerflow to us; in aʼ wisdom and skill,

⁹ Makin kent to us the hidden secret oʼ his wull, eʼen by his gude guidin that he ettled in his sel,

¹⁰ Lookin to the perfeteness oʼ the times, to bring thegither aʼ things for Christ oʼ things in heeven and things on yirth, aʼ in him;

¹¹ In wham eʼen we war made an inheritance, bein set oot aforehaun by the purpose oʼ him wha works aʼ things by the coonsel oʼ his ain mind.

¹² That we soud be for the praise oʼ his glorie, wha war the first to lippen to Christ.

¹³ In wham ye too, hearin the leal word, the Gude‐tidins oʼ yere salvation — in wham lippenin, war sealʼt wiʼ the Holie Spirit oʼ promise.

¹⁴ Wha is the arles oʼ oor inheritance, till the possession be aʼ redeemed, to the praise oʼ his glorie.

¹⁵ For the same cause, I too, hearin oʼ yere faith iʼ the Lord Jesus, and the love ye hae to aʼ the saunts,

¹⁶ Am aye giean thanks on yere accoont, namin ye ower iʼ my prayers.

¹⁷ That the God oʼ oor Lord Jesus Christ, the Faither oʼ glorie, may gie ye a spirit oʼ wisdom and revealin in his knowledge:

¹⁸ Yere inward een bein fuʼ oʼ licht, that ye may come to ken what the hope oʼ his blythe‐bidden is, what his rich inheritance oʼ glorie iʼ the saunts,

¹⁹ And what the unmeasured vastness oʼ his pooer toward us wha hae faith, eʼen as by the up haudin oʼ his micht,

²⁰ Whilk he wrocht in Christ, raisin him frae ʼmang the deid, and settin him doon amang aʼ the heevenlies, at his ain richt‐haun,

²¹ Far up aboon aʼ rule, and authoritie, and pooer, and dominion, and ilka name that is named, no alane iʼ this warld, but eke in that that is to come:

²² And “pat aʼ things under his feet”; and gied him as heid ower aʼ things to the Kirk;

²³ Whilk in sooth is his body, the completion oʼ him wha completes aʼ in aʼ for himsel.