Colossians 4 - New Testament in Braid Scots 1904 (William Wye Smith)

CHAPTIR FOWR. Deal cannilie wiʼ thae no yet brocht in! A hantle oʼ gude wishes for his freends.

¹ Maisters, do justice and equity to yere servants; mindin that ye too hae a Maister in Heeven.

² Gie yersels to prayer; takin tent thar‐in, wiʼ giean oʼ thanks.

³ And prayin for us as weel, that God wull unsteek to us a door for the word, to speak the ferlies oʼ Christ, for whilk I hae become a prisoner;

⁴ That I may mak it plain; eʼen as I am hauden to speak.

⁵ Walk ye wyssly anent thae ootside; obteenin the opportunity for yersels;

⁶ Yere speech at aʼ times bein wiʼ grace, kitchenʼd wiʼ saut; that ye may ken hoo ye soud be giean ilk ane his answer.

⁷ Aʼ that regairds me, Tychicus wull mak kent tʼye — the weel‐loʼed brither, and faithfuʼ servitor, and fellow‐server iʼ the Lord.

⁸ Him hae I sent tʼye, for this vera thing, that ye may ken the things regairdin us, and that he micht comfort yere hearts.

⁹ Thegither wiʼ Onesimus, the leal and weel‐loʼed brither, wha is frae amang ye. Aʼ things here wull they mak kent tʼye.

¹⁰ Aristarchus, my marrow in captivity, salutes ye; and Mark, cousin oʼ Barnabas, anent wham ye had instructions. Gin aiblins he comes to ye, gie him welcome.

¹¹ And Jesus, the ane caʼd “Justus”; they bein oʼ the circumceesion. Thir alane are fellow‐workers iʼ the kingdom oʼ God; wha in truth, hae been comforters oʼ me.

¹² Epaphras salutes ye, wha is frae ʼmang ye, a servitor oʼ Jesus Christ: at aʼ times warslin in yere behauf in prayer, that ye may be made to staun complete, and wiʼ fuʼ assurance in aʼ things oʼ the wull oʼ God.

¹³ For I bear witness, that he has unco fainness for ye, and for thae in Laodicea, and thae in Hierapolis.

¹⁴ Luke, the weel‐loʼed leech, and Demas, salute ye.

¹⁵ Salute ye the brethren in Laodicea; and Nymphas, and the meetin that is in their hoose.

¹⁶ And whansaeʼer the letter has been read amang ye, eʼen mak it to be read iʼ the Kirk oʼ the Laodiceans: and that, as weel, the ane oot oʼ Laodicea be read.

¹⁷ And say to Archippus: “Tak tent weel to the stewardship ye received iʼ the Lord, that it ye may fulfil!”

¹⁸ The salutation oʼ me Paul, wiʼ my ain haun. Mind ye my chains! Tender love be wiʼ ye!