Colossians 2 - New Testament in Braid Scots 1904 (William Wye Smith)

CHAPTIR TWA. Christ for safety; and no philosophy or ordinances!

¹ For I wad hae ye ken hoo great a fecht I am haein for ye, and for thae oʼ Laodicea; and for as mony as haena seen my face iʼ the flesh.

² In order that their hearts may be comfortit, bein wrocht aʼ intil ane in love, eʼen till aʼ the treasurs oʼ the perfete assurance oʼ the mind, till a fuʼ knowledge oʼ the mysterie oʼ God, eʼen Christ.

³ In wham are aʼ the treasurs oʼ wisdom and lear hidden.

⁴ But I am sayin this, that nane may wyle ye agley wiʼ fleechin words.

⁵ For gin I be sindry frae ye iʼ the flesh, yet am I ane wʼye iʼ the Spirit, rejoicin, and seein yere orderliness, and the steive biggin oʼ yere faith anent Christ,

⁶ In sic way as ye received Christ Jesus the Lord, in him be walkin!

⁷ Bein firm‐rutit and up‐biggit in him, and bein made siccar iʼ the faith, conform till yere teachin; aboundin in thanksgivin.

⁸ But tak ye tent, least some ane may be makin booty oʼ ye, throwe philosophy and vanities oʼ deceit, conform to menʼs instruction, conform to the warldʼs elements, and no conform to Christ.

⁹ For in him dwalls aʼ the abundance oʼ the Godheid in form‐oʼ‐body.

¹⁰ And ye are made fuʼ in him, wha is the heid oʼ aʼ principalitie and authoritie;

¹¹ In wham ye hae been circumceesʼd wiʼ the circumceesion no wiʼ hauns, iʼ the pittin‐aff oʼ the body oʼ the flesh, iʼ the “Christ‐circum?-?ceesion”;

¹² Bein wiʼ him buryʼt iʼ yere bapteezin, in whilk ye war raised wiʼ him again, throwe the faith oʼ the workin oʼ God, wha raised him frae ʼmang the deid:

¹³ And you, deid iʼ the sins and uncircumceesion oʼ yere flesh, he has made to leeve again wiʼ him; oot oʼ love forgiean us aʼ offences.

¹⁴ Blottin oot the haun‐write again us, in ordinances, that was contrar to us; and took it awa, nailin it to his cross!

¹⁵ And haein strippit principalities and pooers, he made a plain spectacle oʼ them, and a triumph ower them thar‐by.

¹⁶ Lat nane, than, be condemnin ye anent eatin or drinkin, or in regaird oʼ a feast, or a new‐mune, or the Sabbaths;

¹⁷ That are a “shadow” oʼ comin things; but the “body” is Christ.

¹⁸ Lat nane twine ye, by a putten‐on humility, like the worship oʼ an Angel; pratin aboot things he “has seen”; swalled up wiʼ the vain importance oʼ a carnal mind.

¹⁹ And no haudin steive the heid, oot oʼ whilk the hail body, throwe the joints and union‐bands haein supply, and joinin itsel thegither, is growin wiʼ the growth oʼ God.

²⁰ Gif ye deeʼt wiʼ Christ frae the warldʼs elements, hoo, than (as gin ye war still leevin iʼ the warld), are ye subject to ordinances:

²¹ “Ye mauna handle,” “ye maunna taste,” “ye mauna touch!”

²² (Whilk are aʼ to come to an end in the usin!) conform to the commauns and teachins oʼ men?

²³ Whilk, in truth, are things, in ae view, haein an appearance oʼ wyss?-?heid in aneʼs ain‐devised worship and humility of mind, and ill‐doin wiʼ aneʼs ain body: no in ony honor:— merely a satisfying oʼ the flesh.