Colossians 1 - New Testament in Braid Scots 1904 (William Wye Smith)

CHAPTIR ANE. Paul tells what Christ is like: he likes weel to describe his Freend!

¹ Paul, an Apostle oʼ Christ Jesus, throwe Godʼs wull, wiʼ Timothy, oor brither,

² To the holie and leal brethren in Christ in Colosse: tender‐love to ye, and peace, frae God oor Faither,

³ We are aye giean thanks to the God and Faither oʼ oor Lord Jesus Christ; praying at aʼ times on yere behauf.

⁴ Hearin oʼ yere faith in Christ Jesus, and the love ye bear to aʼ the saunts.

⁵ On accoont oʼ the hope that is lyin‐by for ye iʼ the Heevens, oʼ whilk ye heard afore iʼ the word oʼ the truth oʼ the Blythe‐message,

⁶ That has come to you, eʼen as it is bearin frute and growin iʼ aʼ the warld, sae amang you as weel, frae whatna day ye first heard the sough oʼt, and cam to ken the tender‐love oʼ God in truth:

⁷ Conform to what ye had frae Epaphras, oor dear fellow‐servant, wha is a leal servitor oʼ Christ for us;

⁸ Wha eke made kent to us your love iʼ the Spirit.

⁹ And for this, we oorsels, frae what day we heard it, cease‐na prayer and seekin, that ye may be filled wiʼ the fuʼ knowledge oʼ his wull, in aʼ wisdom and spiritual discernment;

¹⁰ That ye soud walk in sic mainner wordie oʼ the Lord, until pleasin him; in aʼ gude warks bearin frute, and growin in the lear oʼ God.

¹¹ In aʼ micht bein made michty, conform to the micht oʼ his ain glorie for aʼ tholin and patience wiʼ joy.

¹² Giean thanks to the Faither, wha gars us to be fit to partak oʼ the inheritance oʼ the saunts in licht;

¹³ Wha deliverʼt us oot oʼ the pooer oʼ the mirkness, and translatit us intil the Kingdom oʼ the Son oʼ his love.

¹⁴ In wham we hae redemption, the passin by oʼ sins.

¹⁵ Wha is the likeness oʼ the invisible God, the first‐born oʼ aʼ the creation.

¹⁶ For in him war aʼ things creatit, things in Heeven and things on the yirth, the things seen and the things no seen; whether throns, or dominions, or principalities or authorities — thir aʼ, throwe him, and for his sake, hae been creatit.

¹⁷ And he is afore aʼ things, and by him aʼ things haud thegither,

¹⁸ And he is the heid oʼ the body, the Kirk; wha is the original, the “first‐born” frae mang the deid; that he may become, amang aʼ, the pre‐eminent.

¹⁹ For in him it was the gude‐pleasur oʼ the Faither that aʼ boundless rowth soud dwall;

²⁰ And throwe him to reconcile aʼ things to his sel, makin peace throwe the blude oʼ his cross, whether things on yirth, or things in the Heevens.

²¹ And you, at ae time bein fremd, and wiʼ enmitie iʼ yere minds by ill warks, has he fuʼ‐reconciled,

²² Iʼ the body oʼ his flesh, throwe his death, to bring ye intil his presence holie, and fautless, and wyteless.

²³ Gin at least ye bide iʼ the faith, sterk and steive, and no dung?-?awa frae the hope oʼ the Gude‐word ye heard, that was preached till aʼ the creation ʼneath the heevens; oʼ whilk I Paul becam a servitor.

²⁴ Noo I am blythe to suffer on yere behauf, and am fillin up what was wantin oʼ the Christ‐tribulations in my flesh, on account oʼ his body, that is the kirk:

²⁵ Oʼ whilk I becam a servitor, conform tae the stewardship oʼ God, whilk was gien me for you, to fulfil the word oʼ God.

²⁶ The riddle that was hidden awa frae the ages and the generations, but is at this time made kent to the saunts;

²⁷ To wham God wulled to mak it kent, eʼen the treasur oʼ the glorie oʼ this riddle iʼ the nations, whilk is Christ in you, the hope oʼ glorie.

²⁸ Wham we declare, warnin ilka man, and teachin ilka man in aʼ wisdom, that we soud present ilka man perfete in Christ.

²⁹ To whilk end I am toilin, battlin accordin to his workin, whilk works in me wiʼ pooer.