Acts 6 - New Testament in Braid Scots 1904 (William Wye Smith)

CHAPTIR SAX. Deacons to tak tent oʼ the needy. Stephen taen haud oʼ.

¹ Noo, iʼ thae days, thar gat up a murmurin amang the Grecian Jews again the Hebrew anes, aboot the weedows bein owerlookit iʼ the giean‐oot oʼ the daily breid.

² And the Twalʼ brocht the thrang oʼ the disciples thegither, and quoʼ they, “Itʼs no bonnie that we soud leaʼ the service oʼ the Word oʼ God, and serʼ tables.

³ “Sae, brethren, look ye oot frae ʼmang yersels seeven men oʼ gude name, wyss men, fuʼ oʼ the Spirit, that we may set ower this maitter.

⁴ “But we wull mainteen oorsels aye in prayer, and iʼ the service oʼ the Word.”

⁵ And the word was weel thocht oʼ aʼ the thrang; and they named Stephen, ane fuʼ oʼ faith and the Holie Spirit, and Philip, and Prochorus, and Nicanor, and Timon, and Parmenas, and Nicolas, a proselyte frae Antioch.

⁶ Wham they set fornent the Apostles; and whan they had prayed they set their hauns on them.

⁷ And the word oʼ God grew uncolie; and the feck oʼ the disciples multiplyʼt in Jerusalem; and an unco thrang oʼ the priests followʼt the faith.

⁸ And Stephen, fuʼ oʼ love and pooer, wrocht great warks and ferlies amang the folk.

⁹ But certain anes raise up, oʼ the Synagogue caʼd “Oʼ the Freemen,” baith Cyrenians and Alexandrians, and thae frae Cilicia and Asia, arguin wiʼ Stephen.

¹⁰ And they warna fit to staun again the wisdom and the Spirit he spak wiʼ.

¹¹ And they set on men, wha said, “We hae heard him lichtlie Moses, and lichtlie God!”

¹² And they made a steer amang the folk, and elders, and scribes, and cam on him, and grippit him, and harlʼt him to the Cooncil,

¹³ And set up witnesses forsworn, wha said, “This man is aye speakin ill oʼ the Holie Place, and the Law;

¹⁴ “For we hae heard him threep that this Jesus oʼ Nazareth sal whammle ower this place, and sal do awa wiʼ the orderin that Moses gied us.”

¹⁵ And aʼ that war iʼ the Cooncil, glowerin at him, saw his face eʼen like an Angelʼs face!