Acts 5 - New Testament in Braid Scots 1904 (William Wye Smith)

CHAPTIR FYVE. Ananias and Sapphira: wha could hae gien as little or as muckle as they likit, but leeʼt aboot the siller.

¹ Noo a certain man, Ananias, wiʼ Sapphira his wife, sellʼt a propertie.

² And keepit some oʼ the siller hidlins, his wife kennin oʼt, and brocht some oʼt, and pat it doon at the Apostlesʼ feet.

³ And Peter said, “Ananias! Whaurfor has Sautan fillʼt yer heart, to play fause to the Holie Spirit, and to keep hidlins some oʼ the siller frae the grund?

⁴ “Whiles ye had it, wasʼt no yere ain? And whan ye sellʼt it, wasʼt no iʼ yere ain haun? Hoo hae ye imaginʼt thir things in yere heart? for ye didna deal fause‐heartit wiʼ men, but wiʼ God!”

⁵ And Ananias, hearin thir words, fell doon and deeʼt; and muckle fear fell on aʼ that heard.

⁶ And the young men raise, and rowʼt him up, and bure him oot, and buryʼt him.

⁷ And eftir aboot thrie ʼoor, his wife cam in — no kennin ocht that was dune —

⁸ And Peter speirʼt at her, “Tell me, sellʼt ye the grund for sae and sae?” And she said, “Aye; for sae and sae.”

⁹ Than said Peter, “Hoo isʼt ye hae coonsellʼt thegither to temp the Spirit oʼ the Lord? See! the feet oʼ them that hae buryʼt yere gudeman are at the door, and sal cairry ye oot!”

¹⁰ And she fell juist doon at his feet, and deeʼt; and the young men cam in and faund her deid, and bure her oot, and buryʼt her by her gudeman.

¹¹ And great fear cam on aʼ the Kirk, and on aʼ that heard thir things.

¹² And mair: by the hauns oʼ the Apostles war mony tokens and ferlies wrocht amang the folk: and they war aʼ, wiʼ ae mind, in Solomonʼs Porch.

¹³ But oʼ the lave, thar war nane oʼ them venturin to come in wiʼ them; but the folk aʼ laudit them.

¹⁴ And believers mair war addit to the Lord, thrangs baith oʼ men and weemen:

¹⁵ Sae muckle, that they eʼen cairryʼt oot the sick folk till the causey, and pat them doon on beds and couches, that (gin nae mair), the shadow oʼ Peter, as he cam by, micht faʼ on a wheen oʼ them!

¹⁶ And thar war comin thegither, the vera thrang frae ither cities roond Jerusalem, feshin sick anes, and that war fashed wiʼ unclean spirits; and they war healed ilka ane.

¹⁷ Than raise up the Heigh‐priest, and aʼ they that war wiʼ him (they oʼ the sect of the Sadducees), and war fuʼ oʼ anger,

¹⁸ And grippit the Apostles, and pat them iʼ the toʼbooth.

¹⁹ But the Angel oʼ the Lord, by nicht, cam and unsteekit the doors oʼ the toʼbooth, and feshʼt them oot, and said,

²⁰ “Gang ye, and tak yere staun iʼ the Temple, and tell the folk aʼ the words oʼ this life!”

²¹ And whan they heard this, they enterʼt iʼ the dawin to the Temple, and spak. But the Heigh‐priest cam, and thae that war wiʼ him, and orderʼt the Cooncil thegither, and aʼ the men oʼ eild oʼ Israʼl, and sent to the toʼbooth to hae them brocht.

²² But the officers that cam faund‐them‐na iʼ the prison, and gaed back again, and tellʼt,

²³ And quoʼ they, “The toʼbooth faund we steekit, and aʼ safe; and the keepers staunin at the doors; but whan we had openʼt, we faund nae man within.”

²⁴ And whan the Heigh‐priest and the Temple‐captain, and the boonmaist oʼ the priests, heard thir things, they dootit iʼ their sels aboot them — what aʼ this wad come till?

²⁵ But thar cam ane and tellʼt them, “Look! The men ye pat iʼ the toʼbooth are staunin iʼ the Temple, and teachin the folk!”

²⁶ Than gaed the Captain, wiʼ the officers, and feshʼt them wiʼ aʼ courtesie — for they war fleyʼd oʼ the folk, least they micht hae been staned.

²⁷ And whan they had brocht them, they set them fornent the Heigh‐Cooncil. And the Heigh‐priest speirʼt at them, sayin,

²⁸ “Did we no chairge ye stricklie no to be teachin iʼ this name? And see! ye hae fillʼt aʼ Jerusalem wiʼ yere teachin, and ettle to bring this manʼs blude on us!”

²⁹ Than answerʼt Peter and the Apostles, “It behoves us to mind God, mair nor mind man!

³⁰ “The God oʼ oor faithers raised‐again Jesus, that ye slew, hingin him on a tree!

³¹ “Him has God upliftit at his richt haun, to be a Prince and a Saviour, to gie repentance to Israʼl, and remission oʼ sins.

³² “And we are his witnesses oʼ thae things; and sae too is the Holie Spirit, that God has gien to them that obey him.”

³³ Whan they heard that, they war cut to the heart, and coonsellʼt thegither to kill them.

³⁴ But thar raise ane oʼ the Heigh‐Cooncil, a Pharisee, Gamaliel, a doctor oʼ the Law, hauden in honor oʼ aʼ the folk, and gae orders to pit the men oot for a wee.

³⁵ And quoʼ he to them, “Men oʼ Israʼl; tak tent to yersels, what ye ettle to do wiʼ thir men!

³⁶ “For langsyne raise Theudas, makin his sel oot to be somebody; aboot whom a hantle oʼ men gaitherʼt, aboot fowr hunder: wha was killʼt; and as mony as war perswadit oʼ him war skailʼt, and cam to nocht.

³⁷ “Eftir him raise Judas oʼ Galilee, iʼ the days oʼ the enrollin; and drew awa muckle folk eftir him: he too perishʼt; and aʼ as mony as followʼt him, war cuisten abreid.

³⁸ “And anent thir things I say, lat bide thir men! for, aiblins gin this coonsel or this wark be oʼ men, it wull faʼ;

³⁹ “But gin aiblins it be oʼ God, ye canna ding it doon; least ye eʼen be fund fechtin again God.”

⁴⁰ And to him they greeʼd; and, bringin forrit the Apostles, they bade them be cloured, and chairged them no to be speakinʼ iʼ the name oʼ Jesus; and loot them gang.

⁴¹ And they gaed oot frae the face oʼ the Heigh‐Cooncil, blythe that they war coontit wordie oʼ dreein ill for Jesusʼ sake.

⁴² And day‐by‐day iʼ the Temple, and iʼ the hooses, they war aye teachin, and preachin Jesus Christ.