Acts 28 - New Testament in Braid Scots 1904 (William Wye Smith)

CHAPTIR TWENTY‐AUCHT. Paul lands at Malta: and iʼ the end, wins to the citie oʼ the Emperor: (and belyve to the citie oʼ the great King!)

¹ And whan we had gotten safely throwe, than we kent that the island was caʼd Melita.

² And the barbaric folk schawed us unco kindness; for they luntit a fire, and took us in, on accoont oʼ the rain that set in, and the cauld.

³ But whan Paul had gaitherʼt some eldin, and had putten it on the fire, a viper cam oot wiʼ the heat, and grippit on his haun.

⁴ And whan the folk saw the beasʼ hingin frae his haun, they said ane to anither, “To a certaintie this man is a murderer; and thoʼ he has escapit the sea, yet Justice suffers‐na to leeve!”

⁵ Natheless, he sheuk aff the beasʼ intil the lowe, and gat nae skaith:

⁶ Thoʼ they war lookin that he wad hae swalled, or faun doon deid. But whan they had waitit a lang time, and naething gaed wrang wiʼ him, they changed their minds, and quoʼ they, “He is a god!”

⁷ Noo, iʼ thae pairts was the estate oʼ the heid man oʼ the isle, by name Publius; wha made us welcome, and enterteened us thrie days wiʼ aʼ courtesie.

⁸ But sae it was, that Publiusʼ faither was ill oʼ a fivver and a bludie lax; and Paul, comin in, laid his hauns on him and prayed, and healed him.

⁹ And whan this had taen place, the ithers wha iʼ the isle had illnesses, cam forrit, and war healed;

¹⁰ Wha, too, wiʼ mony kindnesses favorʼt us; and whan we sailed awa, they pressʼt on us sic things as we micht need.

¹¹ And eftir thrie months we set sail in a ship that had been winterin iʼ the isle, an Alexandrian ship, wiʼ an ensign, “The Twin‐Brithers.”

¹² And caʼin in at Syracuse, we staid thar thrie days;

¹³ And frae thar, wiʼ a sweep we cam roond to Rhegium; and eftir ae day a South win raise, and on the second day we wan to Puteoli;

¹⁴ Whaur we faund brethren, and war entreatit oʼ them to bide seeven days; and sae toward Rome we gaed.

¹⁵ And whan frae thar the brethren heard tell oʼ us, they cam oot to meet us the lenth oʼ “Appii Forum” and “Thrie Taverns”; and seein them Paul blessʼd God, and took heart.

¹⁶ And whan we war enterʼt Rome, Paul had leesance to bide by himsel, wiʼ a sodger wha had ward oʼ him.

¹⁷ And it cam aboot, eftir thrie days, he caʼd thegither to him the heid men oʼ the Jews; and whan they had forgatherʼt, he said to them. “Men! brethren! I, haeʼin dune naething contrar to oor folk, or the customs oʼ oor faithers, was gien up oot oʼ Jerusalem to the Romans.

¹⁸ “Wha, examinin me, wad hae releasʼt me, for that thar was no a cause oʼ death in me.

¹⁹ “But as the Jews protestit, I bude to appeal to Cesar — no as gin I had ocht again my ain nation.

²⁰ “And sae I hae sent for ye, to see and speak wiʼ ye; for it is for the Hope oʼ Israʼl this chain dae I bear!”

²¹ But they said to him, “We oorsels naither had letters aboot ye frae Judea, nor did ony oʼ the brethren come and report ony ill oʼ ye.

²² “But we wad ye soud gie us yere mind; for anent this Sect, it is kent to us that it is on every‐haun condemned.”

²³ Sae, haein set a day, a hantle oʼ them cam to him at his lodgin; and to them he exponed, testifyin oʼ the kingdom oʼ God, and perswadin them anent Jesus, baith frae Moses and the prophets, frae the dawin to the gloamin.

²⁴ And some war perswadit oʼ the things he spak; and ithers war dour.

²⁵ And ʼgreein‐na amang their sels, they retirʼt; Paul giean them ae word: “Weel said the Holie Spirit by Esaiah the Prophet to yere faithers, sayin:

²⁶ “ ‘Gang yere ways to this folk, and say, Wiʼ hearin ye sal hear, and no comprehend; and seein, sal ye see, and no behauld;

²⁷ “ ‘For gross has this folkʼs heart become; and wiʼ dour lugs they hear‐na; and their een hae they steekit; least they soud see wiʼ their een, and hear wiʼ their lugs, and wiʼ their heart understaun, and soud turn again, and I soud heal them.’

²⁸ “Be it kent to ye, than, that this salvation oʼ God is offerʼt to the nations; and they wull hear it!”

²⁹ And whan he had said this, the Jews gaed awa, and had unco argle‐barglin amang their sels.

³⁰ And he was a hail twa‐year in his ain hired dwallin, and welcomed aʼ that cam in to him.

³¹ Settin forth the kingdom oʼ God, and exponin the things anent the Lord Jesus Christ, wiʼ aʼ freedom oʼ speech, nane hinderin him.