Acts 27 - New Testament in Braid Scots 1904 (William Wye Smith)

CHAPTIR TWENTY‐SEEVEN. Paul, and the ship, and the sea; aʼ iʼ the howe oʼ Godʼs loof! But the storm ends; and what God ettles comes to pass.

¹ And whan it was settlʼt that we war to sail to Italy, thay gied ower Paul and a wheen ither prisoners to a captain by name Julius, oʼ Augustusʼ band.

² And, gaun on board a ship oʼ Adramyttium, aboot to be sailin for the seaports oʼ Asia, we pat to sea; Aristarchus, a Macedonian oʼ Thessalonica bein wiʼ us.

³ And on the morn we pat into Sidon; and Julius courteouslie treatin Paul, gied him liberty to gang to his freends and be enterteenʼd.

⁴ And frae thar we pat oot to sea, and sailed to the lee oʼ Cyprus, for that the winʼ was contrar.

⁵ And, sailin ower the sea aff Cilicia and Pamphylia, we cam to Myra, oʼ Lycia.

⁶ And thar, the captain finʼin an Alexandrian ship gaun to Italy, pat us on board her.

⁷ But, for a gude wheen days, gaun cannilie, and wiʼ some fash winnin fornent Cnidus — the winʼ no allooin us to reach thar — we sailed aneath the lee oʼ Crete, ower fornent Salmone.

⁸ And wiʼ muckle wark coastin on, we cam till a particular place caʼd “Fair Havens,” nar whilk was a citie, Lasea.

⁹ But a gude space oʼ time bein taen up, and sailin bein noo dangerous — for the Fast was eʼen noo gane by — Paul gied them advisement,

¹⁰ Saying to them, “Sirs, I see that the voyage wull be wiʼ skaith and muckle loss, no alane to the lade and the ship, but eke oʼ our lives.”

¹¹ But the captain took mair tent to what the ship‐master and the owner said, than to the things spoken by Paul.

¹² And mair: the harbor no bein safe to winter in, the feck oʼ them gied advice to set sail oot, gin by ony means they micht aiblins mak Phenice; thar to winter: whilk is a harbour oʼ Crete, as ane looks Sou?-?wast and Nor‐wast.

¹³ Noo, a south win saftly blawin, thinkin they had gotten what they wantit, weighin the anchor, they sailed alang Crete, nar to the shore.

¹⁴ But no lang eftir, thar struck her a winʼ, a tornado, caʼd “The East‐Norʼ‐Easter”;

¹⁵ And the ship, bein flauchtit awa, and no bein able to look the win iʼ the face, we gied her up, and war carryʼt alang.

¹⁶ And rinnin aneath the lea oʼ a smaʼ island caʼd Clauda, we war jimply able to secure the boat.

¹⁷ Whilk haein taen up, they war usin helps, frappin the ship: and jalousin they micht be cuisten on the Great Quicksand, they loot the veschel gang; sae thae war carryʼt alang.

¹⁸ But, bein uncolie tossed wiʼ the tempest, on the morn they begude to fling the ladin overboard;

¹⁹ And on the third, the tacklin oʼ the ship.

²⁰ But naither sun nor starns blinkin on us for mony days, and an unco storm lyin on us, at the end aʼ hope oʼ bein deliverʼt was gane.

²¹ But whan they had been lang wantin meat, Paul, staunin amang them said, “Sirs, ye soud hae listenʼt tae me, and no hae been settin sail frae Crete, to win this skaith and loss.

²² “And, at this present, I coonsel ye to be oʼ gude heart; for loss oʼ life thar sal be nane amang ye; but the loss oʼ the ship.

²³ “For ane stude by me this nicht, an Angel oʼ God, whase I am, and to wham I pay service,

²⁴ “Sayin, ‘Fear‐ye‐na, Paul! Afore Cesar ye sal staun: and behauld! God has gien to ye aʼ them that sail wʼye.’

²⁵ “Sae, be oʼ gude heart, Sirs! for I hae faith in God that sae it sal be — iʼ the way tellʼt to me:

²⁶ “Thoʼ on a particular island we man be wreckʼt.”

²⁷ But whan the fowrteenth nicht was noo come, as we war driven aboot in Adria, aboot the midnicht the sailors jaloused that some kintra was drawin nar‐haun.

²⁸ And soondin, they faund it twenty faddoms; and gaun a wee on, and soondin again, they faund fyfteen faddoms.

²⁹ And, dreidin they micht aiblins be wreckʼt in some rocky bit, they cuist fowr anchors oot oʼ the stern, and wishʼt for the day.

³⁰ But whan the sailors war seekin to escape oot oʼ the ship, and had loutit doon the boat intil the sea, as gin they wad tak oot anchors frae the bow,

³¹ Paul says to the captain, and to the sodgers, “Gin thae bide‐na iʼ the ship, ye canna be deliverʼt!”

³² Than the sodgers cast awa the tows oʼ the boat, and loot her faʼ aff.

³³ And till siccan a time as the dawin cam, Paul was entreatin them aʼ to tak meat, sayin, “A fowrteenth day, this day, are ye makin, wantin meat, and giean yersels naething;

³⁴ “Sae, I entreat ye, tak some meat; for this is for yere gude; for no a hair oʼ the heid oʼ ony oʼ ye sal perish!”

³⁵ And haein said thir things, he took a laif, and gied thanks to God afore them aʼ, and breckin it, begude to eat.

³⁶ And sae, takin up gude heart, they theirsels took meat.

³⁷ Noo we war — the hail number oʼ sauls iʼ the ship — twa hunner and seeventy‐sax.

³⁸ And whan they had eaten eneuch, they eased the ship, thrawin oot the wheat intil the sea.

³⁹ And whan the day cam, they didna ken the lanʼ, but takin tent oʼ a particular cove, wiʼ a strand, they war ettlin, gin it war possible, to drive the ship in.

⁴⁰ And, cuttin awa the anchors, they loot them gang intil the sea; and lowsin the lashin oʼ the rudders, and heizin up the foresail to the gale, they held for the strand.

⁴¹ But, faʼin intil a place whaur twa currents met, they ran the ship a‐grunʼ: the bow remained fast, and was immovable; but the stern brak intil pieces wiʼ the onset oʼ the waves.

⁴² Noo, the sodgers ettled to slay the prisoners, sae that nane oʼ them soud soom oot and get awa.

⁴³ But the captain, wha desirʼt to deliver Paul, keepit them frae their intention, and direckit thae that coud soom — pittin aff first — to get to the lanʼ;

⁴⁴ And the lave, some on deals, and some on ither things oʼ the ship. And sae it cam aboot, that aʼ war brocht safely throwe to the lanʼ.