Acts 24 - New Testament in Braid Scots 1904 (William Wye Smith)

CHAPTIR TWENTY‐FOWR. Paul afore Felix.

¹ And, fyve days eftir, the Heigh‐priest cam doon, wiʼ a wheen oʼ the Elders; and a spokesman, ane Tertullus; and deponed again Paul afore the Governor.

² And whan he was caʼd, Tertullus begude to mak accusation, sayin, “Inasmuckle as by you we obteen great peace, and gude comes to this nation throwe yere wisdom,

³ “We receive it aye, and in ilka place, maist excellent Felix, wiʼ aʼ thanks.

⁴ “But, that I be‐na wearisome tʼye, I entreat ye to hear us, iʼ yere courtesie, for a wee wheen words.

⁵ “For, findin this man a pest, and teachin treason amang aʼ the Jews iʼ the hale inhabited‐warld, and a heid ane oʼ the sect oʼ the Nazarenes;

⁶ “Wha ettled to pollute eʼen the Temple: him we grippit, and wad hae tried conform to oor Law;

⁷ “But the chief officer Lysias cam wiʼ muckle pooer, and tuik him oot oʼ oor hauns;

⁸ “Orderin his accusers to come to you; frae wham ye yersel wull be able, on speirin anent aʼ thir things, to establish wiʼ accuracy, aʼ that we wyte him wiʼ.”

⁹ And the Jews aʼ joined iʼ the chairge, threepin that thir things war sae.

¹⁰ And whan the Governor had signed for him to speak, Paul answerʼt, “Inasmuckle as I ken ye hae been thir mony year judgin this nation, I dae wiʼ gude heart mak my defence,

¹¹ “Seein that ye may mak oot clearly, that nae mair days are gane nor twalʼ, sinʼ I gaed up till Jerusalem to worship,

¹² “And naither faund they me iʼ the Temple argle‐barglin wiʼ ony ane, or gaitherin a thrang, nor yet iʼ the kirks, nor iʼ the citie.

¹³ “Nor can they lead prufe oʼ what they noo wyte me wiʼ.

¹⁴ “But this muckle I confess tʼye, that, conform to ‘The Way,’ whilk they caʼ a Schism, sae dae I serʼ my faitherʼs God; hauding fast aʼ thae things that are putten doon iʼ the Law and iʼ the Prophets.

¹⁵ “Haein a hope wiʼ God, whilk they theirsels haud, that thar sal be a Risin‐again baith oʼ the gude and the ill.

¹⁶ “And oʼ this I am makin a task, to hae a gude conscience aye; baith toward God and man.

¹⁷ “Noo, eftir a gude wheen years, I cam to fesh aumous to my nation, and offerans:

¹⁸ “Amang whilk they faund me, purifyʼt iʼ the Temple; no wiʼ aʼ thrang, nor wiʼ ony steer;

¹⁹ “But a wheen Jews frae Asia made the steer: wha sud hae been here, and makin accusation, gin they had ocht again me.

²⁰ “Or lat thir here tell what ill they faund in me, as I stude afore the Cooncil;

²¹ “Gin it be‐na for this ae thing, whan I cryʼt oot, staunin amang them, ‘Anent the Risin‐frae the deid am I wytit afore ye this day!’ ”

²² But Felix delayʼt them, to hae mair certain knowledge oʼ “The Way”; sayin, “Whan Lysias the chief officer sal come doon, I wull determine yere maitter.”

²³ Giean orders to the captain to keep him, and alloo proper freedom, and hinder nane oʼ his ain acquaintance frae comin to him.

²⁴ And eftir a wheen days, Felix cam wiʼ Drusilla his ain wife, a Jewess; and sent for Paul, and listened to him anent the faith in Christ.

²⁵ Noo, as he was reasonin oʼ justness, and self‐guidin, and a Judgment to come, Felix was terrifyʼt, and quoʼ he, “Gae yere ways enoo; but whan I fin a fit time, I wull send for ye.”

²⁶ And he was lookin that siller micht hae been gien him by Paul: sae he sent for him aftener, and had converse wiʼ him.

²⁷ But whan twa year had gane by, Felix was succeedit by Portius Festus; and, to gain favor wiʼ the Jews, Felix left Paul a prisoner.