Acts 22 - New Testament in Braid Scots 1904 (William Wye Smith)

CHAPTIR TWENTY‐TWA. Paulʼs speech: they hear him till he touches their prejudices; and than, nae mair! It is unco like our ain time!

¹ “Men, brethren and faithers! Wull ye hear my defence afore ye, at this present?”

² And whan they heard that he spak to them iʼ the Hebrew speech, they keepit the mair whushʼt; and he said,

³ “I am a man, a Jew, born in Tarsus oʼ Cilicia; but brocht up iʼ this citie, at Gamalielʼs feet, stricklie trained in aʼ the auld ways: bein frae the first fuʼ oʼ zeal for God, as aʼ ye are this day.

⁴ “And I persecutit ‘The Way’ to the death, grippin and giean ower to dungeons baith men and weemen.

⁵ “As eʼen the Heigh‐priest can witness for me, and aʼ the Elders: frae wham I get letters to oor brethren, and journeyʼt to Damascus, ettlin to fesh thae wha had gane thar, to Jerusalem, that they soud be dealt wiʼ.

⁶ “And it cam aboot as I gaed on, and cam nar to Damascus, aboot noon, on a suddaintie, oot oʼ the lift, cam an unco licht aʼ aboot me.

⁷ “And I fell to the yird; and heard a voice sayin to me, ‘Saul! Saul! why soud ye be pursuin me?’

⁸ “And I answerʼt, ‘Wha art thou, my Lord?’ And he said to me, ‘I am Jesus oʼ Nazareth, that ye are pursuin!’

⁹ “And thae wiʼ me saw in fact the licht, but they kent‐na the words oʼ him speakin to me.

¹⁰ “And I speirʼt, ‘What maun I do, my Lord?’ But the Lord said to me, ‘Up! and gae intil Damascus; and thar ye sal be tellʼt aʼ things ye hae to do!’

¹¹ “And as I coudna see, for the glorie oʼ that licht, bein airtit by the haun oʼ thae that war wiʼ me, I gaed intil Damascus.

¹² “And ane Ananias, a worshippin man conform to the Law, weel‐spoken oʼ by aʼ the Jews bidin thar,

¹³ “Comin in to me, and staunin ower me, says to me, ‘Saul! brither! look up!’ And I, that vera ʼoor, lookit up on him.

¹⁴ “And he said, ‘Oor faithersʼ God appointit ye that ye micht ken his wull, and see the Richtous Ane, and hear words frae his mooth.

¹⁵ “ ‘For ye sal be a witness for him, to aʼ men, oʼ the things ye hae seen, and did hear.

¹⁶ “ ‘And noo why are ye delayin? Rise; be bapteezʼt, and wesh awa yere sins, prayin to his name!’

¹⁷ “And it cam aboot again, whan I cam back to Jerusalem, that I fell into a dwaum;

¹⁸ “And he was sayin to me, ‘Haste ye, and gang oot frae Jerusalem; for they winna tak yere witness oʼ me!’

¹⁹ “And I said, ‘Lord, they ken that I pat in dungeons, and cloured iʼ the kirks, thae believin on thee!

²⁰ “ ‘And whan Stephen thy martyrʼs blude was shed, eʼen I mysel was staunin by, and approvin; and took chairge oʼ their cleedin what slew him.’

²¹ “But he said to me, ‘Awa! for I wull send ye oot far awa, to the nations!’ ”

²² Noo they hearkened as far as this word; and than cryʼt aʼ oot, sayin, “Awa wiʼ siccan a ane frae the yirth! for it isna fit he soud leeve!”

²³ And as they made an ootcry, and rived their manteels, and cuist stoor intil the air,

²⁴ The officer gied orders to fesh him intil the castle; saying he was to be put to the test wiʼ rods, that he micht ken why they war in siclike shoutin again him.

²⁵ And as they war tyin him wiʼ the tows, Paul says to the captain that stude by, “Is it allooed to ye to clour a man, a Roman, and no condemned?”

²⁶ And whan the captain heard that, he gaed till the chief officer, sayin, “What are ye aboot? For this man is a Roman!”

²⁷ And the officer cam, and quoʼ he, “Tell me, are ye a Roman?” And he said, “Aye.”

²⁸ And the officer said, “I, wiʼ spendin muckle siller, gat this citizenship.” But Paul said, “I was born tillʼt.”

²⁹ Than at ance they gaed aff wha soud hae putten him to the test: and the officer was fleyʼt whan he faund he was a Roman, and that he had tied him up.

³⁰ And on the morn, wantin to ken till a certaintie why he was wytit by the Jews, he lowsed him frae his bonds; and orderin aʼ the Heigh‐priests, and aʼ their Cooncil, to come thegither, he feshʼt Paul doon, and set him in their mids.