Acts 18 - New Testament in Braid Scots 1904 (William Wye Smith)

CHAPTIR AUCHTEEN. The Jews at Corinth. Gallio wadna listen to them. Paul leaʼs Europe.

¹ Eftir thir things, leaʼin Athens, he cam to Corinth.

² And, lichtin on a particular Jew, by name Aquila, a Pontus man by nativity, late come frae Italy, and his wife Priscilla — for Claudius had gien orders for aʼ Jews to leaʼ Rome — he cam to them.

³ And for that he was oʼ the same trade, he bade wiʼ them, and wrocht; for they war tent‐makers by trade.

⁴ And he was reasonin iʼ the kirk ilka Sabbath; and perswadit Jews and Greeks.

⁵ Than, whan baith Silas and Timothy cam doon frae Macedonia, Paul was led on in his preachin, demonstratin to the Jews that Jesus was the Anointit Ane.

⁶ But as they set theirsels to oppose and revile, shakin oot his raiment, he said to them, “Yere blude be on yere ain heid; I am clear! Frae this oot I gang to the Gentiles!”

⁷ And, flittin frae thence, he cam intil the hoose oʼ a man by name Titus Justus, devout toward God; whase hoose was neibor to the kirk.

⁸ But Crispus, the kirk‐ruler, believed iʼ the Lord, wiʼ his hail hoosehauld. And a hantle oʼ the Corinthians, hearin, war believin, and war bapteezʼt.

⁹ And the Lord said by nicht to Paul, in a vision, “Be‐na fleyʼt; and spare‐na to speak!

¹⁰ “For I am wiʼ ye; and nane sal set upon ye, to do ye ill; for I hae a hantle oʼ folk iʼ this citie.”

¹¹ And he bade a year and sax month; teaching amang them Godʼs word.

¹² But when Gallio was Proconsul oʼ Achaia, the Jews made an onset on Paul, and had him up for trial.

¹³ Sayin, “This ane is perswadin men to worship God, contrar to the law!”

¹⁴ Noo, whan Paul was aboot to open his mouʼ, Gallio says to the Jews, “Gin it indeed had been a maitter oʼ stour and strife, and ill‐deedie wickedness, O Jews! I wad hae reason to thole wʼye:

¹⁵ “But gin they be quastens anent words, and names, and laws oʼ yere ain — ye sal see to that yersels! Nae judge oʼ siccan things sal I be!”

¹⁶ And he cuist them oot frae the coort.

¹⁷ And they aʼ, grippin haud oʼ Sosthenes, the kirk‐ruler, cloured him iʼ the presence oʼ the coort. And Gallio took nae heed oʼ thir things.

¹⁸ But Paul, still bidin a gey wheen days wiʼ the brethren, than bade them fareweel, and sailed awa to Syria; and wiʼ him Aquila and Priscilla; he shavin his heid in Cenchrea, for he had made a vow:

¹⁹ And than cam ower intil Ephesus; and he left them ahint thar; but he, his sel, gaed intil the kirk, and reasoned wiʼ the Jews.

²⁰ And thoʼ they war seekin to hae him bide langer, he didna consent:

²¹ But bad them fareweel, sayin, “I wull come back tʼye, gin God wull!” and set sail frae Ephesus;

²² And landin at Cesarea, and gaun up and salutin the kirk, he gaed doon to Antioch;

²³ And, takin some time, he gaed forth, gaun throwe aʼ thae pairts in order — Galatia and Phrygia — puttin heart intil the disciples.

²⁴ Noo, a Jew, Apollos by name, an Alexandrian born, a man oʼ lear, cam doon to Ephesus, bein michtie iʼ the word.

²⁵ The same had been instruckit by hearin the way oʼ the Lord: and bein warm‐heartit, was speakin and teachin eidentlie aboot Jesus, kennin but the baptism oʼ John.

²⁶ He, too, begude to speak freely iʼ the Jewsʼ kirk. But Priscilla and Aquila, haein heard him, took him to them, and mair carefully exponed to him the way oʼ God.

²⁷ And he being ready to gang throwe intil Greece, the brethren wrate to the disciples to tak him in joyfully; wha, comin thar, helpit weel thae wha believed, wiʼ his gifts.

²⁸ For, wiʼ unco vigor, he publicly confoundit the Jews oot and oot, makin plain by the Word that Jesus was the Anointit Ane.