Acts 16 - New Testament in Braid Scots 1904 (William Wye Smith)

CHAPTIR SAXTEEN. The Blythe‐message intil Europe, wiʼ pain and travail.

¹ And he cam intil Derbe and Lystra, and behauld! a particular disciple was thar, named Timothy, son oʼ a believin Jewess, but oʼ a Greek faither;

² Wha was weel‐spoken oʼ by the brethren at Lystra and Iconium.

³ This ane Paul wad hae to gang oot wiʼ him. And he took and circumceesed him, on accoont oʼ the Jews iʼ thae pairts — for they aʼ kent that his faither was a Greek.

⁴ And as they gaed throwe the cities, they deliverʼt intil their keepin the word that had been gien oot by the Apostles and Elders in Jerusalem.

⁵ Sae war the assemblies made strang iʼ the faith, and increased in numbers day by day.

⁶ And they gaed by the Phrygian and Galatian kintra, haein been forbidden by the Holie Spirit to proclaim the word iʼ the Province oʼ Asia;

⁷ And comin alang Mysia, they ettled to gang intil Bythinia; but the Spirit oʼ Jesus didna alloo them:

⁸ And, gaun by Mysia, they cam doon to the Troad.

⁹ And a vision appearʼt to Paul iʼ the nicht: thar stude a Macedonia‐man, and entreatit him, sayin, “Come ye ower intil Macedonia, and bring us help!”

¹⁰ Noo, seein the vision, at ance we socht to gang oot intil Macedonia; concludin that God had bidden us proclaim the Blythe‐message to them.

¹¹ Settin sail, than, frae the Troad, we held straucht to Samothracia; and on the morn to Neapolis;

¹² And frae thar to Philippi, whilk is a chief citie oʼ that pairt oʼ Macedonia — a “Colony.” And we war in yon citie a wheen days.

¹³ And on the Sabbath we gaed oot oʼ the port by a watir‐side, whaur we thocht thar wad be a place for prayer; and, sittin doon, we war speakin to the weemen that cam thegither.

¹⁴ And a particular wumman, by name Lydia, a purple‐seller, oʼ the citie oʼ Thyatira, ane devout toward God, heard us; whase heart the Lord openʼt, that she soud tak gude tent to what Paul spak.

¹⁵ Noo, whan she was bapteezʼt, and her househauld, she besocht us, sayin, “Gin ye hae judged me to be leal to the Lord, come awa to my hoose, and bide thar!” And she garʼd us sae do.

¹⁶ And it cam aboot, as we war gaun to the place oʼ prayer, a lass wiʼ a spirit oʼ magic met us, wha brocht her maisters muckle siller by her soothsayin.

¹⁷ This ane, followin Paul and us, was aye crying oot, “Thir men are servants oʼ the Maist Heigh God; wha are airtin ye iʼ the way oʼ salvation!”

¹⁸ And this she was doin a gey wheen days. But Paul, sair putten‐aboot, turned and said to the spirit, “I chairge ye, iʼ the name oʼ Jesus Christ, to come oot oʼ her!” And it cam oot that vera ʼoor.

¹⁹ But her owners, seein that eke the hope oʼ their gains was thus far‐awaʼ, laid haud on Paul and Silas, and harlʼt them intil the merkit‐place to the rulers,

²⁰ And bringin them afore the magistrates, quoʼ they, “Thir men are an unco pest to oor citie — they bein Jews —

²¹ “And are settin forth customs that are naither to be acceptit nor dune — we bein Romans.”

²² And aʼ the thrang raise up again them: and the magistrates strippin aff their claes, gae orders to clour them wiʼ rods.

²³ And, layin on them mony stripes, they cuist them intil the Toʼbooth, chairgin the jailer to keep them siccar.

²⁴ Wha, on siccan a chairge as this, cuist them intil the benmaist dungeon, and stellʼd their feet siccar iʼ the stocks.

²⁵ And aboot the midnicht, Paul and Silas war prayin, and hymnin God; and the prisoners war hearin them.

²⁶ And aʼ at ance cam a great yirdin, sae that the fundations oʼ the prison trimlʼt; and at ance aʼ doors unsteekit, and aʼ bonds war lowsed.

²⁷ Noo the jailer, raisʼd oot oʼ his sleep, and seein aʼ the prison‐doors unsteekit, drawin his blade, wad hae made awa wiʼ his sel, thinkin the prisoners aʼ fled.

²⁸ But Paul cryʼt oot wiʼ a lood voice, “Lat nae skaith come tʼye! for we are aʼ here!”

²⁹ And he caʼd for a licht, and rushed in; and trimlʼt, and fell doon afore Paul and Silas,

³⁰ And bringin them oot, said, “My Lords, what maun I be doin, that I may be savʼd?”

³¹ And they said, “Hae faith in the Lord Jesus, and ye sal be savʼd; yersel and yere hoose!”

³² And they spak to him the word oʼ the Lord, and to aʼ that war in his hoose.

³³ And, takin them wiʼ him, in that ʼoor oʼ the nicht, he weshʼd their stripes, and was bapteezʼt, he and aʼ his, on the spot.

³⁴ And feshin them intil his apairtments, he set a table afore them, and had unco rejoicin, wiʼ aʼ his hoosehauld — believin in God.

³⁵ But whan day cam, the magistrates sent to the officers, sayin, “Let gang thae men!”

³⁶ And sae the jailer tellʼt the words to Paul, “The magistrates hae sent that ye micht gang; sae noo, gaun forth, depairt in peace!”

³⁷ But Paul said, “They hae cloured us in public — and uncondemned — men that are Romans, and they hae cuisten us intil a dungeon; and noo dae they send us oot hidlins? No sae! but lat them come their sels and lead us oot!”

³⁸ Noo the officers took back to the magistrates thir declarations; and they war taen wiʼ fear, hearin they war Romans;

³⁹ And, comin, they besocht them; and, leadin them oot, they entreatit them to gang awa frae the citie.

⁴⁰ And they, comin oot oʼ the Toʼbooth, gaed to Lydia; and, seein the brethren, they consoled them; and gaed awa.