Acts 13 - New Testament in Braid Scots 1904 (William Wye Smith)

CHAPTIR THIRTEEN. Saul (nae mair Saul noo, but Paul), wiʼ Barnabas, gangs a hantle oʼ places, preachin; and has mony sauls gien to him.

¹ Noo thar war iʼ the assembly at Antioch, baith prophets and teachers; sic like as Barnabas, and Simon (him caʼd Niger), Lucius oʼ Cyrene, and Manaen, wha was foster‐brither to Herod, the king‐depute, and Saul.

² And, as they serʼt the Lord, and war fastin, the Holie Spirit said, “Set apairt to me Barnabas and Saul, for the wark to whilk I hae bidden them.”

³ Sae, fastin and prayin, and layin their hauns on them, they sent them aff.

⁴ They, thus sent oot by the Holie Spirit, gaed doon to Selucia; and frae thar sailed the lenth oʼ Cyprus.

⁵ And, gaun forrit to Salamis, they proclaimed the word oʼ God iʼ the kirks oʼ the Jews; and they had John to attend them.

⁶ And gaun throwe the hail Isle the lenth oʼ Paphos, they cam on a particular man, a magician, a fause‐prophet, a Jew, by name Bar‐jesus.

⁷ Wha was wiʼ the governor‐depute, Sergius Paulus, a man oʼ discernment. He, caʼin for Barnabas and Saul, desirʼt to hear the word oʼ God.

⁸ But Elymas the magician (for sae is translatit his name), withstude them, seekin to turn the governor‐depute frae the faith.

⁹ But Saul — wha cam to be caʼd Paul, as weel — fuʼ oʼ the Holie Spirit, lookin sternly at him, says,

¹⁰ “O fuʼ oʼ aʼ guile and aʼ wrang — son oʼ the Enemy — wull ye no haud frae makin gleyʼd the straucht ways oʼ the Lord?

¹¹ “And noo, see! the Lordʼs haun is on ye! And yeʼse be blinʼ, no seein the sun till the time come!” And at ance thar fell on him a misty mirkness; and, gaun aboot, he was seekin for some ane to airt him by the haun.

¹² Than the governor‐depute, seeing what had come about, believed; being made to ferlie at the word oʼ the Lord.

¹³ Noo, settin their sails frae Paphos, Paulʼs company cam to Perga oʼ Pamphylia. But John, leaʼin them, gaʼed back to Jerusalem.

¹⁴ Hoobeit they, leaʼin Perga, cam till Antioch in Pisidia; and gaun intil the kirk on the Sabbath‐day, sat doon.

¹⁵ And, the law being read — and the prophets — the kirk‐rulers sent to them, and quoʼ they, “Men, brethren! gin ye hae ony word oʼ gude‐coonsel for the folk, say on!”

¹⁶ And Paul, staunin up, and motioning wiʼ his haun, said, “Men, wha are Israʼlites, and ye that fear God, hearken!

¹⁷ “The God oʼ this nation Israʼl, waled oot oor forbears, and raised up the folk whan they bade in Egyptʼs lanʼ; and wiʼ a lofty airm he led them oot oʼt.

¹⁸ “And for aboot forty yearsʼ time tholed he their behavior iʼ the wilderness.

¹⁹ “And, castin doon seeven nations in Canaanʼs lanʼ, garʼt them inherit their lanʼ, for aboot fowr hunner and fifty year.

²⁰ “And eftir thae things, gied he them Judges, till Samuel, a prophet.

²¹ “And eftir they socht for a king, and God gied them Saul, son oʼ Kish, a man oʼ Benjaminʼs tribe, for forty years.

²² “And whan he had putten him aside, he raised up Dauvid for their king. Oʼ him, he said, bearin witness, ‘I faund Dauvid, oʼ Jesse, a man eftir my ain heart, wha sal do aʼ my wull.’

²³ “Oʼ this manʼs seed, has God, conform to his own promise, brocht to Israʼl, a Saviour, Jesus.

²⁴ “John haein preached afore his comin the bapteezinʼ oʼ Repentance, to aʼ Israʼlʼs folk;

²⁵ “And as John performed his task, he said, ‘Wha tak ye me to be? I am‐na he! But, tent ye! ane is comin eftir me, the shoon oʼ whase feet I am‐na fit to lowse!’

²⁶ “Men! brethren! bairns oʼ Abraʼmʼs race! and whasae amang ye fears God! to you the word oʼ this salvation is sent out!

²⁷ “For they oʼ Jerusalem, and their rulers, kennin naither him nor the words oʼ the prophets that are read ilka Sabbath‐day, they hae eʼen fulfillʼt them in condemnin him.

²⁸ “And eʼen though they faund nae cause oʼ death in him, yet demandit they oʼ Pilate that he soud be slain.

²⁹ “And whan they had finishʼt aʼ things anent him whilk had been putten doon, they took him doon frae the tree, and laid him in a tomb.

³⁰ “But God waukened him frae ʼmang the deid.

³¹ “And he was seen for a gey wheen days, to thae wha cam up wiʼ him frae Galilee to Jerusalem; wha, at this present, are his ee‐witnesses to the people.

³² “And to you we are giean the Blythe‐message, as to the promise made to the faithers,

³³ “That God has fulfillʼt the same to our bairns, by raisin up Jesus; as it is putten doon iʼ the first Psalm, ‘My Son art thou! This day hae I begotten Thee!’

³⁴ “And, in that he raised him frae ʼmang the deid, noo nae mair to faʼ back to corruption, he thus says, ‘I wull gie you the faithfuʼ lovin‐kindnesses oʼ Dauvid!’

³⁵ “Sae as in anither place he says, ‘Thou winna gie thy Holy Ane to see corruption!’

³⁶ “For Dauvid his sel, eftir he had serʼd God in his ain life‐time, fell sleepin, and was laid wiʼ his faithers, and saw corruption:

³⁷ “But he that God waukened up saw corruption nane!

³⁸ “Sae be it kent to you, men! brethren! that throwe this man is proclaimed to you the lowsinʼ oʼ sin!

³⁹ “And throwe himʼ, aʼ wha believe are justifyʼt frae aʼ things, no possible by Mosesʼ law to be justifyʼt frae.

⁴⁰ “Tak tent, than! sae that come‐na on ye spoken oʼ in the prophets:

⁴¹ “ ‘Tak tent, ye that geck! and ferlie ye, and dwine awa! For I work a wark iʼ your days, a wark yeʼse no believe though ane set it plain afore ye!’ ”

⁴² And whan they skailʼt frae the kirk, they desirʼt that thir words soud be tellʼt them the neist Sabbath.

⁴³ Noo, whan the kirk brak up, thar followʼt mony oʼ the Jews, and oʼ the godlie seekers, wiʼ Paul and Barnabas; wha, speakin till them, heartit them up to continue in Godʼs love.

⁴⁴ But on the comin Sabbath, nar‐haun the hail citie cam thegither to hear the word oʼ the Lord.

⁴⁵ But the Jews, seein the thrangs, war fuʼ oʼ jealousie, and spak again thae things that Paul said, miscaʼinʼ them.

⁴⁶ And Paul and Barnabas, wiʼ great freedom oʼ speech, said, “It was necessar that the word oʼ God soud first be spoken to you: seein ye hae cuisten it frae ye, and adjudge yersels no wordie oʼ eternal life — than, turn we to the Gentiles!

⁴⁷ “For sae has the Lord bidden us: ‘I hae set thee up for a licht to the Gentiles, that thou may be for salvation to the far‐awa ends oʼ the yirth!’ ”

⁴⁸ And as the Gentiles heard this, they war pleased, and glorifyʼt the word oʼ the Lord; and as mony as had come to be disposed to eternal life, believed.

⁴⁹ And the word oʼ the Lord was spread abreid in aʼ that kintra‐side.

⁵⁰ But the Jews steered up the godlie weemen oʼ gude‐standin, and the heid men oʼ the citie, and raised up a feud again Paul and Barnabas, and cuist them oot oʼ their borders.

⁵¹ But they, flaffing the stoor aff their shoon again them, cam to Iconium.

⁵² And the disciples war filled wiʼ joy and wiʼ the Holie Spirit.