Acts 12 - New Testament in Braid Scots 1904 (William Wye Smith)

CHAPTIR TWALʼ. Herod smites James, and wad smite Peter; but is smitten his sel! Gin kings war wyss, they wad smite less.

¹ Noo, it was thar‐aboot, that Herod the King raxʼt oot his hauns to do ill to some oʼ the Kirk.

² And he slew James, Johnʼs brither, wiʼ the sword.

³ And seein it flatterʼt the Jews, he gaed on mair, and grippit Peter as weel (thae war the days oʼ the Sad Breid).

⁴ And whan he had grippit him, he laid him in thrall; giean him ower to fowr fowrsome sets oʼ sodgers, to keep him; ettlin, eftir the Pasche, to fesh him oot to the people.

⁵ Sae Peter was keepit iʼ the dungeon; but earnest prayer was made aʼ the time to God for him.

⁶ And whan Herod wad hae feshʼt him oot, at nicht Peter was sleepin atween twa sodgers, fast wiʼ twa chains; and gairds afore the door tentit the prison.

⁷ And see! an Angel oʼ the Lord stude by him, and a licht glintit iʼ the dungeon; and giean Peter a dunt on the side, he raised him up, sayin, “Rise up! Haste!” and the chains slypit aff frae his hauns.

⁸ And the Angel said, “Mak yersel snod, and tie on yere shoon!” And he did sae. And he says to him, “Cast yere manteel aboot ye, and follow me.”

⁹ And, gaun oot, he followʼt; and kent‐na it was true what the Angel did, but thocht he dreamed a dream.

¹⁰ And gaun throwe a first ward, and than a second, they cam to the airn yett that led oot to the citie; whilk unsteekit oʼ its ain sel to them; and gaun oot, they gaed on throwe ae street; and the Angel left him.

¹¹ And Peter, comin to his sel, said, “Noo ken I oʼ a certaintie, that the Lord sent oot his Angel, and deliverʼt me frae Herodʼs haun, and frae aʼ the expectation oʼ the Jewish folk.”

¹² And thinkin a wee, he cam to the hoose oʼ Mary, Johnʼs mither — the ane caʼd Mark; whaur mony war forgatherʼt, and prayin.

¹³ Noo as he chappit at the door oʼ the porch, thar cam oot a lass to hearken, named Rhoda.

¹⁴ And, kennin Peterʼs voice, for joy she unsteekit‐na the yett, but rinnin in, she tellʼt “that Peter was staunin fornent the yett.” But they said to her, “Ye are wud!”

¹⁵ But she, on her side, threepit that it was even sae! But they said, “It is his wraith!”

¹⁶ But Peter, aʼ this time, was chappin; and openin, they war astonishʼt.

¹⁷ But, motionin to them wiʼ the haun to be whishʼt, he tellʼt them aʼ hoo the Lord had led him frae the prison; and said as weel, “Tell thir things to James and the brethren!” And, gaun on, he cam intil anither place.

¹⁸ Noo whan it was day, thar was an unco steer amang the sodgers, “What has become oʼ Peter?”

¹⁹ And whan Herod had socht for him, and faund him no, pittin the keepers to the test, orderʼt them to be putten to deid; and gaun doon frae Judea intil Cesarea, he bade thar.

²⁰ Noo he was unco vexed wiʼ the folk oʼ Tyre and Sidon; but wiʼ ae mind they war comin to him; and, makin a freend oʼ Blastus the kingʼs chaumerlain, they socht for peace, for that their pairts were mainteened by the kingʼs kintra.

²¹ And, on a day appointit, Herod, buskit in royal robes, and sittin on a thron, made a set speech tae them.

²² And the folk made a shout, cryin, “A godʼs voice, and no a manʼs voice!”

²³ And at ance the Angel oʼ the Lord dang him, for that he gied‐na God the glorie; and he was devoorʼt oʼ worms, and deeʼt.

²⁴ But the word oʼ God grew mair and mair.

²⁵ And Barnabas and Saul cam back frae Jerusalem, whan they had dune their message; takinʼ wiʼ them John, caʼd Mark.