3 John 1 - New Testament in Braid Scots 1904 (William Wye Smith)

CHAPTIR ANE. To godly Gaius; and anent anither that was ower muckle pitten his sel forrit.

¹ The Elder tae Gaius the weel‐loʼed, wham I loʼe truly.

² Beloved, I pray that in aʼ things ye may be prosperin, and be in health; eʼen as ye are prosperin in yere saul.

³ For I was blythe whan the brethren cam, and bure witness to yere aefauldness, eʼen as ye are walkin in aefauldness.

⁴ Greater joy hae I nane than that I soud be hearin oʼ my bairns, ganging iʼ the truth.

⁵ Beloved, a thing oʼ faith are ye doin, whatsae ye are doin for the brethren — and to them being fremd folk tʼye.

⁶ Wha testifyʼt afore the Kirk to yere love; wham ye sal do weel to set forrit on their journey, in a way wordie oʼ God.

⁷ For in behauf oʼ “The Name” they gaed forth, takin naething frae thae ootside.

⁸ We, than, soud susteen sic as thir, that we may be fellow‐workers wiʼ the truth.

⁹ I wrate somewhat to the Kirk, but he wha is fain to be heid amang them — Diotrephes — bids me nae welcome.

¹⁰ Whaur‐for, gin aiblins I come, I wull hae in mind his warks that he dis, wiʼ ill‐words miscaʼin us; and, no content wiʼ thir things, he naither bids welcome the brethren, nor hauds frae castin oot oʼ the Kirk thae that are sae disposed.

¹¹ Beloved, pit‐ye‐na on that whilk is ill, but that whilk is gude. The weel‐doer is oʼ God; the ill‐doer hasna seen God.

¹² Aʼ hae borne witness to Demetrius; and the truth itsel. We too, gie witness, and ye ken oor witness is true.

¹³ Mony things had I to write ye; but I am‐na ready wiʼ ink‐and‐pen to be writin tʼye;

¹⁴ But I am hopin belyve to see ye, and we will speak mouʼ to mouʼ. Peace be tʼye. The freends salute ye. Salute ye the freends by name.