2 Timothy 3 - New Testament in Braid Scots 1904 (William Wye Smith)

CHAPTIR THRIE. Ill men comin. But haud ye weel tae the truth.

¹ But oʼ this tak ye tent, that iʼ the last days fearsome times wull come.

² For men wull be lovers oʼ their sels, lovers oʼ siller, boastfuʼ, prood, miscaʼers, undutifuʼ to parents, thankless, unholie.

³ Wantin proper affection, twafauld, slanderers, unrestrained, harsh, haters oʼ the just,

⁴ Fause anes, reckless, ram‐stam, lovers oʼ pleasur mair nor lovers oʼ God,

⁵ Mainteenin a shadow oʼ godliness, but castin awa its pooer; frae aʼ thir turn ye awa!

⁶ For frae ʼmang thir are they wha creep intil hooses, and lead awa witless weemen, happit ower wiʼ mony temptations:

⁷ Aye learnin, and never able to come intil the fuʼ knowledge oʼ the truth.

⁸ But in siclike way as Jannes and Jambres stude up again Moses, sae thir men staun up again the truth: men aʼ corruptit iʼ their mind; and to be rejeckit as regairds the faith.

⁹ But theyʼse gang on nae mair, for their folly sal be seen oʼ aʼ men, as was the ithersʼ.

¹⁰ But ye did closely paittern eftir my teachin, mainner oʼ life, ettlins, faith, lang‐tholin, dreein,

¹¹ Persecutions, sufferins; whatna things happened to me in Antioch, in Iconium, in Lystra; whatna persecutions I dreed; and oot oʼ them aʼ the Lord brocht me!

¹² But aʼ wha mak choice to leeve godly in Christ Jesus wull be persecutit!

¹³ But ill men and deceivers wull warsle on their way to the warst, deceivin, and bein deceived.

¹⁴ But div ye bide siccar iʼ the things ye did learn, and war lippened?-?wiʼ, kennin frae whatna teacher ye learned them,

¹⁵ And that, frae a bairn, ye kent the holie Scripturs, that are able to mak ye wyss to salvation, throwe faith that is in Christ Jesus.

¹⁶ Aʼ Scriptur is wiʼ the breath oʼ God, and is oʼ profit for teachin, for convincin, for correctin, for trainin in godliness:

¹⁷ In order that the man oʼ God may be perfete, weel‐fettlʼt for ilka gude wark.