2 Timothy 2 - New Testament in Braid Scots 1904 (William Wye Smith)

CHAPTIR TWA. He urges Timothy to be laborious, wyss, pure, and meek.

¹ Ye, than, my bairn, be strang iʼ the tender‐love that is in Christ Jesus.

² And what ye heard oʼ me throwe mony witnesses, the same things commit ye to aefauld men; sic as can eʼen teach ithers.

³ Thole affliction alang wiʼ us, as a gude sodger oʼ Christ Jesus.

⁴ Nae ane serʼin as a sodger taigles his sel iʼ the affairs oʼ his “leevin”; that he may please him wha summoned him as a sodger.

⁵ And, gin ane be contestin for the gree, he isna crooned, gin he contest‐na in a lawfuʼ way.

⁶ The tiller oʼ the grund that toils maun first partak oʼ the frute.

⁷ Ponder ye what I say; and the Lord wull gie ye discernment in aʼ things.

⁸ Keep in mind Jesus Christ, oʼ Dauvidʼs seed, raised frae the deid, conform to my Blythe‐Message:

⁹ In whilk I dree affliction, eʼen to bonds, as an ill‐doer, but Godʼs word hasna been bund.

¹⁰ For this cause I thole aʼ things, for the sake oʼ the chosen anes, that they may obteen salvation, that whilk is in Christ Jesus, wiʼ glorie never?-?endin.

¹¹ Faithfuʼ is the sayin! “Gin we deeʼt thegither, we sal eke leeve thegither.

¹² “Gin we dree, we sal eke reign thegither; gin we deny, he too wull deny us;

¹³ “Gin we be fause, he leal and true wull aye remain! for he canna be fause to his sel.”

¹⁴ Oʼ thae things pit them in mind, bearin witness iʼ the sicht oʼ the Lord, no to be battlin aboot words for nae gude, but for the puʼin‐doon oʼ thae listenin.

¹⁵ Gie gude tent to present yersel tae God, a workman no tae be putten to shame, portionin‐oot wyssly the word oʼ truth.

¹⁶ But shun ungodly, vain haivers; for they wull but bouk intil mair ungodliness.

¹⁷ And their words wull spread as a canker; oʼ wham is Hymeneus and Philetus;

¹⁸ Wha, in sooth, anent the truth hae gane agley frae the mark, threepin that the Risin‐again is aʼ by‐past; and are destroyin the faith oʼ some.

¹⁹ Nane‐the‐less, the steive fundation oʼ God stauns, haein this seal?-?mark, “The Lord kens his ain!” and, “Lat ilka ane namin the name oʼ the Lord, haud awa frae unrichtousness!”

²⁰ But in a great hoose they are‐na only veschels oʼ gowd and oʼ siller, but eke oʼ wud and oʼ clay; and some for honor and some for dishonor.

²¹ Gin, than, ane purify his sel frae siclike, he sal be an honorable veschel, purifyʼt, usefuʼ to the Maister; made ready for aʼ gude warks.

²² But the passions oʼ youth div thou flee! and follow on eftir richtousness, faith, love, peace, thegither wiʼ thae wha are waitin on the Lord oot oʼ a pure heart.

²³ Frae glaikit and ignorant quaistens haud awa, kennin that they beget strifes.

²⁴ And the servant oʼ the Lord soudna strive; but to be cannie to aʼ; gleg at teachin; ready to thole ill;

²⁵ In meekness instructin thae wha set up their sels as contrar, gif at ony time God gie them repentance, for winninʼ fuʼ knowledge oʼ the truth;

²⁶ And that they soud come to their sels, and win oot oʼ the snare oʼ the Adversary, wha war taen alive by him at his wull.