2 Timothy 1 - New Testament in Braid Scots 1904 (William Wye Smith)

CHAPTIR ANE. Aboot their sels — Paul; Timothy, his mither, and the lave.

¹ Paul, an Apostle oʼ Christ Jesus, throwe the wull oʼ God, conform to the promise oʼ Life that is in Christ Jesus,

² To Timothy, my weel‐loʼed bairn: Tender love, mercie, peace, frae God the Faither, and Christ Jesus oor Lord.

³ Thanks hae I tae God, wham frae my forebears I worship wiʼ a clean conscience, that I hae constant mind oʼ ye in my petitions; nicht and day.

⁴ Bein unco fain to see ye, mindin yere tears, that I may be fuʼ oʼ joy;

⁵ Bein remindit oʼ the aefauld faith that is in ye, whilk in truth dwalt first iʼ yere granʼ‐mither Lois, and iʼ yere mither Eunice; and I am perswadit in you as weel.

⁶ And for this cause I pit ye in mind to steer up Godʼs gift that is in ye, throwe the layin‐on oʼ my hauns.

⁷ For God hasna gien us a spirit oʼ cowardrie, but oʼ pooer, and love, and oʼ a hale mind.

⁸ Be‐na, than, ashamed oʼ the testimonie oʼ oor Lord, nor yet oʼ me his prisoner; but, co‐sufferin ill wiʼ the Gude‐word, conform to the pooer oʼ God;

⁹ Wha saved us, and bade us wiʼ a holie biddin — no conform to oor warks, but conform to an allenar purpose and favor — that whilk was gien us in Christ Jesus afore the ages began,

¹⁰ But is e‐noo made plain throwe the forth‐shininʼ oʼ oor Saviour Christ Jesus; wha pat awa death, but brocht to licht life and immortality, throwe the Gude‐word:

¹¹ Oʼ whilk I was set as a herald, and an Apostle, and a teacher oʼ the Nations.

¹² For whilk cause I dree thir things; but I am‐na putten to shame, for I ken him in wham I hae lippened, and am perswadit that he is michty to gaird what I hae committit to him, to that day.

¹³ Keep ye the paittern oʼ halesome teachins ye heard frae me, in faith and love, that whilk is in Christ Jesus.

¹⁴ The gude thing in yere keepin, gaird ye by the Holie Spirit, wha dwalls in us!

¹⁵ This ye ken, that aʼ they oʼ Asia are gane frae me, oʼ wham are Phygelus and Hermogenes.

¹⁶ May the Lord gie mercie tae the hoose oʼ Onesiphorus, for that he aft refreshʼt me, and wasna shamʼt oʼ my chain:

¹⁷ But, bein in Rome, eidentlie socht me, and faund me.

¹⁸ May the Lord grant to him that he find mercie frae the Lord iʼ that day! and hoo mony times he serʼd at Ephesus, ye ken better yersel.