2 Peter 2 - New Testament in Braid Scots 1904 (William Wye Smith)

CHAPTIR TWA. The folk of Sodom and Gomorrah; and thae that follow their ways.

¹ But thar war fause‐prophets amang the folk; as eʼen amang you wull thar be fause‐teachers: sic as wull hidlins bring in diabolical sects eʼen denying the Lord wha bocht them; bringin doon on theirsels sudden destruction.

² And mony wull follow oot their wanton ways; throwe wham the way oʼ truth wull be miscaʼd;

³ And in their menseless greed, wiʼ twafauld words, wull they mak trokin‐ware oʼ ye: whase condemnation oʼ auld days isna gane‐by, and their destruction sleeps‐na.

⁴ For gin God didna spare Angels whan they sinned — castin them to hell — and deliverin them ower to dungeons oʼ gloom, keepit for judgment;

⁵ And spared‐na the auld warld, letting lowse a flood on the ungodlie anes, but preserved Noah, a preacher oʼ richtousness, as the auchth person:

⁶ And bringin the cities of Sodom and Gomorrah till assis, whammlʼt them ower in condemnation; settin them forth as a lesson to sic as soud eftir be ungodly.

⁷ And richtous Lot, sair vexʼt wiʼ the wanton lives oʼ the wicked, he deliverʼt;

⁸ For wiʼ seein and hearin, that richtous ane dwallin among them was distressin his richtous saul wiʼ their lawless deeds.

⁹ The Lord kens hoo to deliver sic as are godlie oot frae trials; and to keep tae the day oʼ Judgment to to be dealt wiʼ, sic as are ungodlie;

¹⁰ Mair in particular, thae gaun awa eftir the flesh, iʼ the ill‐desires oʼ uncleanness; despisin rule; darin; pamperers oʼ theirsels; authorities they fear‐na to miscaʼ;

¹¹ Whaur‐as Angels, heigher in pooer and micht, fesh‐na a railin accusation again them afore the Lord.

¹² But thir, as beass wantin reason, made to be taʼen and destroyed, miscaʼ things they kenna oʼ, iʼ their snarin sal theirsels be snared!

¹³ Dreein wrang as the ootcome oʼ wrang‐doing; they that coont it a pleasur to riot iʼ the day‐time: blotches and blains; riotin in self?-?deceit as they feast wiʼ you.

¹⁴ Eʼen takin‐up wi an adulteress, and that winna cease frae sin; wheedlin sauls that are waff; wiʼ a heart schuled by greed; bairns that are accurst;

¹⁵ Gaun a‐gley frae the straught way, and are forewanderʼt; traikin eftir the gate oʼ Balaam son oʼ Bosor, wha socht the fees oʼ unrichtousness.

¹⁶ But was repruvʼt for his ain wickedness; a dumb beasʼ wiʼ manʼs voice speakin, forbad the rage oʼ the prophet.

¹⁷ Thir are waal‐ees wantin the watir; mists carryʼt wiʼ the wund; for wham the gloom oʼ mirkness is keepit for aye.

¹⁸ For, speakin unco swalled‐up words oʼ vanity, they wheedle wiʼ fleshly desires, wiʼ wanton ways, thae that war escapin frae them that leeve in error;

¹⁹ They promisin freedom to them, they theirsels bein aʼ the time slaves oʼ corruption. (For, by whateʼer ane has been owercome, he has become a slave tillʼt.)

²⁰ For gin aiblins eftir they had escapit the pollutions oʼ the warld, throwe a knowledge oʼ the Lord and Saviour Jesus Christ, they are again taiglʼt thar‐in — their last state is waur nor the first!

²¹ Unco better for them no to hae kent the way oʼ richtousness ava, than, haein come to ken it, to turn awa frae the holie commaun gien to them!

²² It has come aboot wiʼ them conform to the true sayin, “The dog turnin again to his ain spuein;” and, “A sow weshed, to wallowin iʼ the muck.”