2 Peter 1 - New Testament in Braid Scots 1904 (William Wye Smith)

CHAPTIR ANE. The graun array oʼ Christian virtues; led by Faith, and linked by Love.

¹ Simon Peter, a servitor and Apostle oʼ Jesus Christ, to thae wha obteened the same faith wiʼ us, throwe the richtousness oʼ oor God and oor Saviour Jesus Christ.

² Lovin‐favor to ye, and peace, be made great, iʼ the fuʼ knowledge oʼ God, and Jesus oor Lord;

³ As aʼ things for life and godliness his godly pooer has gien to us, throwe the fuʼ knowledge oʼ him wha has caʼd us to glorie and weel‐doin.

⁴ Whaur‐by he has gien to us unco promises — and precious — that throwe sic ye soud be brocht to hae fellowship wiʼ the Divine natur, and flee the warldʼs corruption in ill‐desires.

⁵ Aye, and for this vera thing, bringin forrit aʼ diligence, add to yere faith courage, and to yere courage knowledge,

⁶ And to knowledge the airtin oʼ yersel, and to the airtin oʼ yersel endurance, and to endurance holiness,

⁷ And to holiness britherly‐kindness, and to yere britherly‐kindness love.

⁸ Thir things belangin tʼye, and aboundin, they sal make ye to be naither idle nor unfrutefuʼ iʼ the fuʼ knowledge oʼ oor Lord Jesus Christ.

⁹ For he wha is wantin iʼ thir things is blearʼt seein‐na far‐awa, haein forgotten the purifyin oʼ his auld sins.

¹⁰ Whaur‐for the raither, brethren, gie gude tent to mak siccar yere callin and walin‐oot; for doin thir things ye sal in naegate at ony time stoiter.

¹¹ For sae sal unco richly be supplyʼt tʼye a graun enterin‐in to the evir‐bidin kingdom oʼ oor Lord and Saviour Jesus Christ.

¹² And sae Iʼse be aye ready to pit ye in mind oʼ thae things; thoʼ ye ken them, and hae been made siccar iʼ the truth present wiʼ ye.

¹³ Nane‐the‐less, I tak it to be richt, as lang as I am iʼ this sheelin, to steer ye up, by remindin ye;

¹⁴ Kennin that sune comes the pittin‐aff oʼ my sheelin, conform to what the Lord Jesus Christ made clear to me.

¹⁵ Yet I will gie gude tent, on ilka occasion, that ye may hae means, eftir my depairtin, to keep in mind aʼ thae things.

¹⁶ For it wasna as followin eftir pawkilie‐wrocht‐oot tales, that we made kent to ye the pooer and presence oʼ oor Lord Jesus Christ; but as ee‐witnesses oʼ his gloriousness.

¹⁷ For whan he was gien frae God the Faither honor and glorie, and a voice cam to him frae that glorious splendor, “This is my Son, the Beloved Ane, in wham I delicht!”

¹⁸ Eʼen this voice we heard, whan it cam frae heeven; we bein wiʼ him iʼ the holie mount.

¹⁹ And we hae the word oʼ prophecie, made maist siccar, to whilk ye do weel gin ye tak gude tent, as to a licht glintin in a mirk place, to what time the dawin come, and the mornin‐starn rise iʼ yere hearts.

²⁰ Kennin this first, that nae prophecie oʼ Scriptur is oʼ allenar and private meaninʼ.

²¹ For nevir cam ony prophecie by the wull oʼ man; but as by Holie Spirit movʼd, sae speak holie men oʼ God.