2 John 1 - New Testament in Braid Scots 1904 (William Wye Smith)

CHAPTIR ANE. The Elder has sweet coonsel wiʼ a Christian mither.

¹ The Elder to a chosen leddy, and her bairns, wham I loʼe iʼ the truth; and no I allenar, but aʼ thae too that hae come to ken the truth;

² For the truth that is bidin in us, and sal be wiʼ us for aye.

³ Lovin‐favor sal be wiʼ us, mercy and peace frae God the Faither, and frae Jesus Christ the Son oʼ the Faither, in truth and love.

⁴ I was blythe that I faund amang yere bairns thae that war ganging iʼ the truth, eʼen as we hae had commaun oʼ the Faither.

⁵ And noo I beg oʼ ye, leddy, no as giean a new commaun to ye, but eʼen what we had frae the first, that we soud loʼe ane anither.

⁶ And this is love, that we gang conform to his commauns. This is his commaun, eʼen as ye heard frae the first, that we soud gang thar‐in.

⁷ For mony fause‐anes hae gane oot intil the warld, they that own‐na that Jesus Christ is come iʼ the flesh. This is a fause‐ane and an antichrist.

⁸ Tak ye gude tent to yersels, least ye tine what things ye did win; but that a fuʼ reward ye may duly hae.

⁹ Whasaeʼer gangs ayont, and bides‐na iʼ the teachins oʼ Christ, hasna God. He that bides iʼ the teachins, eʼen he has baith the Faither and the Son.

¹⁰ Gif ony ane comes tʼye, and brings‐na this teachin, tak‐him‐na to yere hoose, nor say to him, “Joy be wʼye!”

¹¹ For he that says to him, “Joy be wʼye!” marrows wiʼ his ill‐deeds.

¹² Haein mony things to write tʼye, I wadna wiʼ paper‐an‐ink; but I hope to come tʼye, and speak mouʼ to mouʼ, that yere joy may be fuʼ.

¹³ The bairns oʼ yere chosen sister salute ye.