2 Corinthians 9 - New Testament in Braid Scots 1904 (William Wye Smith)

CHAPTIR NINE. Mair aboot the siller for the saunts; and the blessin oʼ a liberal heart.

¹ For anent the service for the saunts, it is needless for me to write to ye.

² For I ken yere readiness oʼ mind, for whilk I roose ye afore them oʼ Macedonia, that Greece was ready a year syne; and yere zeal has steered up the lave.

³ But I hae sent the brethren, least oor boast on yere behauf soud be in vain in this respect; that, as I said, ye micht be preparʼt.

⁴ Least, gif aiblins Macedonians cam wiʼ me, and faund ye no ready, we (that we may‐na be sayin “ye,”) soud be putten to shame iʼ this confidence.

⁵ Sae I thocht it necessar to exhort the brethren that they soud gang forrit till ye, and mak up afore‐haun yere promised liberality, sae as it micht be ready, as a gift gien, and no a thing extortit.

⁶ But as tae this: He wha saws sparely, sal eʼen reap sparely; and wha saws wiʼ blessins sal eʼen reap wiʼ blessins.

⁷ Ilk ane sae, eʼen as he had it in his heart; no oʼ sweirness, nor oʼ necessity; for “God loʼes a cheerfuʼ giver.”

⁸ But God has pooer to mak aʼ favor to abound wiʼ unco rowth, toward ye! sae that in aʼ things and at aʼ times, haein a sort oʼ plenty oʼ yere ain, ye may abound mair and mair in aʼ gude warks.

⁹ As it is putten doon: “He disponed abreid; He gied to the puir; His richtousness bides for aye.”

¹⁰ Noo he wha gies “seed to the sawer, and breid for eatin,” sal supply and mak lairge yere seed sawn, and mak to flourish the ootcome oʼ yere richtousness;

¹¹ In aʼ things bein made rich to aʼ liberality; whilk is workin oot praise to God.

¹² For the cairryin‐oot oʼ this public service isna only makin up for the lack oʼ the saunts, but is frutefuʼ oʼ mony praises to God.

¹³ For that mony, throwe this workin‐oot oʼ this service, are magnifyin God for the obedience oʼ yere confession to the word oʼ Christ, and for the aefauldness oʼ yere gifts for them and for aʼ;

¹⁴ They their sels, wiʼ prayers on yere behauf, are unco fain, for the wonderfuʼ favor oʼ God to ye.

¹⁵ Praise be to God for his unmeasurable bounty!