2 Corinthians 8 - New Testament in Braid Scots 1904 (William Wye Smith)

CHAPTER AUCHT. The liberality oʼ the Macedonians made to steer up a like liberality wiʼ the Corinthians. “Ae thing aye leads to anither.”

¹ Forby, we mak kent tʼye, brethren, the favor oʼ God schawn to the Kirks oʼ Macedonia,

² That in a great trial oʼ sorrow, the rowth oʼ their joy aboundit intil a rich liberality.

³ That, accordin to their pooer, aye eʼen ayont their pooer, oʼ their ain accord,

⁴ They prayed us wiʼ entreaty, as to takin pairt in the giean to the saunts.

⁵ And far ayont oor hopes; giean their ain sels first to the Lord, and to us by Godʼs wull.

⁶ Sae that we exhortit Titus, that as he had made a beginnin, he soud also perfete in you this favor as weel.

⁷ And sae, as in aʼ things ye abound, in faith, and speech, and knowledge, and diligence, and in love to us — ye micht abound too in this grace.

⁸ No by way oʼ commaun div I speak; but for pittin the quality oʼ yere love to the test, on accoont oʼ ithersʼ readiness.

⁹ For ye understaun the love oʼ oor Lord Jesus Christ, in that he made his sel puir for yere sakes (thoʼ he was rich!) that ye, throwe his poortith, micht be made rich.

¹⁰ And in this I gie ye my mind! for this is weel for you, wha indeed begude a year syne, no only to do, but also to wull.

¹¹ And noo, perfete the doinʼ oʼt: that eʼen accordin to the readiness to wull, thar may be the cairryin oot oʼ what ye hae.

¹² For gin the readiness to wull is set forth accordin to what a man has, it is appruvʼt; and no accordin to what he has no.

¹³ For I dinna say that ithers soud hae ease, and ye be burdened.

¹⁴ But by an aiqual‐sharin, yere rowth enoo soud be for their want; that their rowth soud eʼen come to be for yere want; that thar may be aiquality.

¹⁵ Eʼen as it is putten doon, “He that gaitherʼt the mair had nane ower muckle, and he that gaitherʼt the less lacked‐na.”

¹⁶ But God be praised, wha pat the same anxiety in the mind oʼ Titus anent ye.

¹⁷ For thoʼ he acceptit the exhortation, yet bein his sel unco diligent, he gaed till ye oʼ his ain wull.

¹⁸ And we joined wiʼ him the brither, whase praise in the word is throwe aʼ the Kirks.

¹⁹ And no only sae, but wha was deputit by the Kirks to travel wiʼ us in this behauf, whilk is serʼd by us to the Lordʼs glorie, and to schaw oor zeal.

²⁰ Haein it sae, that nae ane soud wyte us in this bounty we are awmoners oʼ.

²¹ Providin honorable things, baith in the sicht oʼ the Lord, and afore men.

²² And we hae jointly sent wiʼ them oor brither wham we hae testit in mony things, at aʼ times, and fund diligent; but noo, muckle mair sae, wiʼ the unco confidence he has toward ye.

²³ Whether is it onything aboot Titus? A pairtner oʼ mine, and a fellow‐worker wiʼ you. Or aboot oor brethren? They are Apostles to the Kirks, and the glorie oʼ Christ.

²⁴ Ye did schaw, tharfor, afore the Kirks, the exhibition oʼ yere love, and oor boastin on yere behauf tae them.