2 Corinthians 5 - New Testament in Braid Scots 1904 (William Wye Smith)

CHAPTIR FYVE. Paul is siccar in his faith oʼ comin glorie: the body may fail, but we flit to a better hoose!

¹ For we ken, that gin aiblins oor yirdly sheilin be taen doon, we hae a biggin oʼ God, a dwallin no made wiʼ hauns, eternal iʼ the Heevens.

² For truly, in this behauf we maen, unco fain to hae spread ower us oor hoose whilk is oʼ heeven;

³ Gin sae that bein coverʼt, we sanna be fund nakit.

⁴ And vera truly, we that are iʼ the sheilin dae maen, bein hauden doon: yet we are‐na fain to be uncoverʼt, but raither to cover oorsels ower; that what is mortal micht be swallowʼt up in immortality.

⁵ Noo, he wha wrocht us oot for this vera thing is God, wha eʼen gied to us the first‐frutes oʼ the Spirit.

⁶ Haein gude heart at aʼ times; kennin that whiles bidin iʼ the body, we are awa frae the Lord;

⁷ For we are gaun on by faith, and no by oor ain een.

⁸ We hae gude heart nane‐the‐less, and are pleased raither to gang frae oot the body, and to come ben to the Lord!

⁹ And sae we are unco fain — be we at hame, or awa frae hame — to pleasur him.

¹⁰ For we maun aʼ be made seen at the bar oʼ Christ, that ilk ane may hae conform to the things dune iʼ the body, eʼen as he has dune, be they gude or ill.

¹¹ Kennin than the dreid oʼ the Lord, we perswad men; but to God we are weel‐kent; and I wad hope that eʼen in yere consciences we hae been made weel‐kent.

¹² We dinna commend oorsels again to ye, but gie ye opportunity to commend us; that ye may hae something for thae wha boast oʼ their ootward things, and no in heart.

¹³ For eʼen gin we war daft, it was for God; or are douce and grave, it is for you.

¹⁴ For Christʼs love rinks us in; for we sae judge, that gin ane deeʼt for aʼ, than in consequence aʼ deeʼt;

¹⁵ And he deeʼt for aʼ, that the leevin soud leeve nae langʼer to their sels, but for him wha on their behauf deeʼt and raise again.

¹⁶ Sae that we, frae this oot, ken nae man, conform to the flesh; eʼen gin we hae — conform to the flesh — kent the Messiah, yet noo, frae this oot, in siclike ken we him nae mair.

¹⁷ Sae than, gif ony man is in Christ, thar is a new creation! auld things hae gane by; lo! aʼ things are made new!

¹⁸ But they are aʼ oʼ God, wha reconcilʼt us to himsel throwe Christ, and gied to us the message oʼ reconciliation;

¹⁹ Hoo that God, in Christ, was reconcilin the world to his ain sel, no coontin up to them their sins; and did pit in us the message oʼ the Reconciliation.

²⁰ For Christ, than, are we Envoys, as gin God war entreatin throwe us: we beseech, for Christ, “Be ye reconcilʼt to God!”

²¹ Him that kent nae sin has he made for us to be as sin; that ye micht come to be a richtousness oʼ God.