2 Corinthians 4 - New Testament in Braid Scots 1904 (William Wye Smith)

CHAPTIR FOWR. In whatna mainner he preached to them he expones in a aefauld way.

¹ And sae, haein this message, eʼen as we had mercie gien us, we didna gie aʼ up;

² But we disowned the secret things oʼ shame, and gang‐na in deceit, nor in a twafauld way dealin wiʼ the word oʼ God; but by the schawin oʼ the truth, seekin favor oʼ ilk manʼs conscience iʼ the sicht oʼ God.

³ But gin aiblins oor Joyfuʼ‐message has onyway come till ye veilʼt — to them wha war perishin it cam to be veilʼt;

⁴ In wham the god oʼ this warld made drumlie their perceptions, least they soud discern the brichtness oʼ Christʼs Joyfuʼ‐message oʼ glorie, wha is the image oʼ God.

⁵ For we proclaim‐na oor ain sels; but Christ Jesus as Lord, and oorsels as yere servitors for Jesusʼ sake.

⁶ For God, wha said, “Oot oʼ the mirk lat licht shine!” has lichtit‐up oor hearts, to gie the licht oʼ the knowledge oʼ God iʼ the face oʼ Christ.

⁷ But we hae this treasur in veschels oʼ clay, that the owermasterin oʼ the pooer may be oʼ God, and no oʼ us.

⁸ On ilka side pressed sair, but no helpless; switherin, but no lackin escape;

⁹ Pursued, but no abandoned; dung doon, but no made an end oʼ;

¹⁰ Aye bearin aboot iʼ the body the putten‐to‐deid oʼ Jesus; that sae eʼen the life oʼ Jesus micht be schawn in oor body.

¹¹ For evermair, we, the leevin, are deliverʼt up tae death, for Jesusʼ sake, that Jesusʼ life micht be schawn in oor mortal flesh.

¹² Sae that death is wrocht in us, inwardly; but life in you.

¹³ Hoobeit, we hae the same spirit oʼ faith, conform to what is putten‐doon, “I had faith, thar‐for spak I;” sae we hae faith, and thar‐for spak:

¹⁴ Lippenin that he wha raised up the Lord Jesus, wull also wiʼ Jesus raise us, and wull present us wiʼ you.

¹⁵ For aʼ things are for yere sakes, sae that, wiʼ grace aboundin throwe the mony, it may mak the praise to abound the mair, to the glorie oʼ God.

¹⁶ Thar‐for we are‐na faint‐heartit; but eʼen thoʼ oor ootward man dwines awa, yet oor inward man is ilka day renewin.

¹⁷ For the wee bit passin sorrow that we hae, is workin oot for us, aye mair and mair, a mair excellent and eternal wecht oʼ glorie;

¹⁸ Sae lang as we look‐na for things seen, but for things unseen: for the seen things are but for a time, but the things no seen are for aye.